অনাগত পঞ্চায়ত নির্বাচন ই ভি এমৰ সলনি বেলট পেপাৰত অনুষ্ঠিত হ’ব বুলি মুখ্যমন্ত্ৰী হিমন্ত বিশ্ব শৰ্মাই প্ৰকাশ কৰিছে। ৪ বা ৫ খন জিলাত পাইলট পৰ্যায়ত ই ভি এম ব্যৱহাৰ কৰা হ’ব বুলি তেওঁ কয়। এইবাৰৰ পঞ্চায়ত নিৰ্বাচন সম্পূর্ণ অৰাজনৈতিক হ’ব বুলিও তেওঁ উল্লেখ কৰে। আঞ্চলিক জিলা পৰিষদৰ নির্বাচন প্রতীক চিহ্নত অনুষ্ঠিত হোৱাৰ বিপৰীতে পঞ্চায়তৰ সভাপতি আৰু সদস্য প্রতীক অবিহনে নির্বাচনত অৱতীৰ্ণ হ’ব। ইয়াৰ লগতে তেওঁ পুৰণি সমষ্টিৰ ভিত্তিত ৰাজ্যত উপ-নির্বাচন অনুষ্ঠিত নহ’ব পাৰে বুলি মতপ্রকাশ কৰে। মুখ্যমন্ত্ৰীগৰাকীয়ে আজি গুৱাহাটী চিকিৎসা মহাবিদ্যালয় হাস্পতালত নিৰ্মাণ হৈ থকা মহিলা আৰু শিশুৰ হাস্পতাল পৰিদৰ্শন কৰি এই সন্দৰ্ভত তথ্য প্ৰকাশ কৰে। ৩৭৫ কোটি টকা ব্যয় সাপেক্ষে এই ৮ মহলীয়া চিকিৎসালয়খন নিৰ্মাণ কৰা হৈছে। কেৱল শিশু আৰু মাতৃৰ চিকিৎসাৰ বাবে নিৰ্মাণ কৰা হাস্পতালখনত এহেজাৰখন বিছনা থাকিব। ২০২১ চনৰ পৰা ৰাজ্যত ৰূপায়ণ হৈ থকা প্ৰকল্পৰ কামসমূহ ২০২৫ চনৰ ভিতৰত সম্পূৰ্ণ কৰা হ’ব বুলি তেওঁ প্ৰকাশ কৰে। আনহাতে বৰ্তমান অসমত ৩৫ হাজাৰ কোটি টকাৰ কাম চলি আছে বুলি মুখ্যমন্ত্ৰীগৰাকীয়ে জানিবলৈ দিয়ে।