আমাৰ দেশত পথ দুৰ্ঘটনাৰ ফলত মৃত্যু হোৱা লোকৰ ৬০ শতাংশৰো অধিক ১৮ ৰ পৰা ৪৫ বছৰ বয়সৰ বুলি কেন্দ্ৰীয় পথ পৰিবহন আৰু ঘাইপথ মন্ত্ৰী নীতিন গাডকাৰীয়ে মন্তব্য কৰিছে। আজি নতুন দিল্লীত আমেৰিকান চেম্বাৰ অৱ কমাৰ্চৰ পথ সুৰক্ষাৰ বাবে – আমচামৰ প্ৰযুক্তি হস্তক্ষেপ -আমেৰিকা-ভাৰত অংশীদাৰিত্ব শীর্ষক অনুষ্ঠানত ভাষণ দি শ্ৰীগাডকাৰীয়ে এইদৰে প্ৰকাশ কৰে। পথ দুৰ্ঘটনাৰ ফলত দেশে মুঠ ঘৰুৱা উৎপাদনত ৩ শতাংশ লোকচানৰ সন্মুখীন হোৱা বুলিও মন্ত্ৰীগৰাকীয়ে লগতে উল্লেখ কৰে। শ্ৰীগাডকাৰীয়ে পথ দুৰ্ঘটনা সমস্যাৰ সমাধান উলিওৱাৰ পূৰ্বে তাৰ কাৰণসমূহৰ যথোচিত পৰ্যালোচনা কৰাৰ আৱশ্যকতাৰ ওপৰত গুৰুত্ব আৰোপ কৰে। তেওঁ লগতে চৰকাৰৰ দুৰ্গতজনৰ সহায়কাৰী আঁচনিৰ বিষয়ে উল্লেখ কৰি কয় যে এই আঁচনিৰ অধীনত দুৰ্ঘটনাগ্রস্ত ব্যক্তিলৈ সহায়ৰ হাত আগবঢ়োৱা লোকসকলক নগদ ২৫ হাজাৰ টকাৰে পুৰস্কৃত কৰা হয়। মন্ত্ৰীগৰাকীয়ে লগতে বিদ্যালয়সমূহক তেওঁলোকৰ পাঠ্যক্ৰমত পথ সুৰক্ষা, শিক্ষা অন্তৰ্ভুক্ত কৰিবলৈও আহ্বান জনায়।