টিডিপিৰ নেতা এন চন্দ্রবাবু নাইডু অন্ধ্রপ্রদেশ বিধানসভাৰ এন ডি এৰ নেতা হিচাপে নিৰ্বাচিত হৈছে। বিজয়ৱাড়াত অনুষ্ঠিত তেলেগু দেশম পার্টী, জনসেনা আৰু বিজেপিৰ বিধায়কসকলৰ বৈঠকত সৰ্বাসন্মতিক্রমে শ্রীনাইডুক নেতা হিচাপে নিৰ্বাচিত কৰা হয়। জনসেনা পাৰ্টীৰ মুৰব্বী তথা পীতা পুৰুমৰ বিধায়ক কে পৱন কল্যাণে বিধানসভাত চন্দ্ৰবাবু নাইডুৰ নাম এন ডি এৰ নেতা হিচাপে প্ৰস্তাৱ কৰে আৰু এন ডি এৰ বিধায়কসকলে এই প্ৰস্তাৱ সৰ্বসন্মতিক্রমে সমৰ্থন কৰে। উল্লেখযোগ্য যে এইবাৰৰ নিৰ্বাচনত অন্ধ্ৰপ্ৰদেশত ১৬৪ খন বিধানসভাৰ আসনেৰে সংখ্যাগৰিষ্ঠতা লাভ কৰি এন ডি এ বৃহৎ জয়লাভ কৰে। ইফালে, জনসেনা পাৰ্টীৰ বিধায়কসকলে আজি দলৰ মুৰব্বী পৱন কল্যাণক অন্ধ্ৰপ্ৰদেশ বিধানসভাৰ নেতা হিচাপে নিৰ্বাচিত কৰে। তেনালীৰ বিধায়ক এন মনোহৰে পৱন কল্যাণৰ নাম প্ৰস্তাৱ কৰে আৰু আন নেতাসকলে এই প্ৰস্তাৱত সন্মতি প্ৰদান কৰে। ১৭৫জনীয়া বিধানসভাত জনসেনাৰ ২১ গৰাকী বিধায়ক আছে।