প্রধানমন্ত্ৰী তথা বিজেপিৰ জ্যেষ্ঠ নেতা নৰেন্দ্ৰ মোদীয়ে আজি তেওঁৰ সংসদীয় সমষ্টি বাৰাণসীত ২৫ হাজাৰৰো অধিক মহিলাৰ সৈতে মতবিনিময় কৰিব। সম্পূর্ণানন্দ সংস্কৃত বিশ্ববিদ্যালয়ত আয়োজিত মাতৃশক্তি সন্মিলনত শ্ৰীমোদীয়ে মহিলা চিকিৎসক, শিক্ষক, ব্যৱসায়ী, আইনবিদ আৰু খেলুৱৈসকলৰ সৈতে মতবিনিময় কৰিব। এঘণ্টাজোৰা এই সন্মিলনত পৰিচালনাকে ধৰি অন্যান্য সকলো কামকাজত মহিলাসকলে মূল ভূমিকা পালন কৰিব। আজি নিশাটো তেওঁ বাৰাণসীত কটাই কাইলৈ উত্তৰ প্ৰদেশত আন দুটা ৰেলীক সম্বোধন কৰিব। শ্রীমোদীয়ে এইবাৰ তৃতীয়বাৰৰ বাবে বাৰাণসীৰ পৰা প্ৰতিদ্বন্দ্বিতা আগবঢ়াইছে। কংগ্ৰেছ-সমাজবাদী মিত্ৰজোঁটৰ প্ৰাৰ্থী অজয় ৰায় শ্রীমোদীৰ বিৰুদ্ধে নির্বাচনী প্রতিদ্বন্দ্বিতাত অৱতীৰ্ণ হৈছে। বাৰাণসীত অহা পহিলা জুনত ভোট গ্ৰহণ কৰা হ’ব।