নতুন দিল্লীত থকা বিজেপিৰ মুখ্য কাৰ্যালয়ত আজি দলটোৰ ইস্তাহাৰ সমিতিৰ বৈঠক অনুষ্ঠিত হয়। এই বৈঠকত লোকসভা নিৰ্বাচনৰ বাবে দলটোৰ ইস্তাহাৰত অন্তৰ্ভুক্ত কৰিবলগীয়া বিষয় সন্দৰ্ভত আলোচনা কৰা হয়। জ্যেষ্ঠ বিজেপি নেতা তথা কেন্দ্ৰীয় মন্ত্ৰী ৰাজনাথ সিঙৰ অধ্যক্ষতাত গঠিত ২৭ জনীয়া সমিতিখনৰ আজি অনুষ্ঠিত প্রথমখন বৈঠকত দলটোৰ বাবে গুৰুত্ব বহন কৰা কেইবাটাও বিষয় পর্যালোচনা কৰা হয়। উল্লেখযোগ্য যে এই সমিতিখনত কেন্দ্ৰীয় মন্ত্ৰী নিৰ্মলা সীতাৰমণক আহ্বায়ক আৰু পিয়ুছ গোৱেলক সহ আহ্বায়ক হিচাবে ৰখা হৈছে। এই সমিতিত মুখ্যমন্ত্রী ড° হিমন্ত বিশ্ব শর্মাও সদস্য হিচাপে অন্তৰ্ভুক্ত হৈছে। ইফালে কংগ্ৰেছ দলৰ কেন্দ্ৰীয় নির্বাচনী সমিতিৰ বৈঠক আজি নতুন দিল্লীত অনুষ্ঠিত হয়। এই বৈঠকত তেলেংগানা লোকসভা নির্বাচনৰ বাবে প্ৰাৰ্থী ঘোষণা কৰা সন্দৰ্ভত আলোচনা কৰা হয়। দলৰ নেতা মল্লিকার্জুন খাৰ্গে, জ্যেষ্ঠ নেত্রী ছোনীয়া গান্ধী, তেলেংগানাৰ মুখ্যমন্ত্ৰী ৰেৱন্থ ৰেড্ডীকে ধৰি ভালেসংখ্যক নেতাকর্মী উপস্থিত থাকে।