২০২৪-২৫ পর্যটন বৰ্ষৰ বাবে মানস ৰাষ্ট্ৰীয় উদ্যান মুকলিৰ দিন সলনি কৰা হৈছে বুলি ৰাষ্ট্ৰীয় উদ্যান কৰ্তৃপক্ষৰ তৰফৰ পৰা জানিব পৰা গৈছে। ২০২৪-২৫ বৰ্ষৰ বাবে বিশ্ব ঐতিহ্য ক্ষেত্ৰ মানস ৰাষ্ট্ৰীয় উদ্যানখন পৰ্যটকৰ বাবে মুকলিৰ দিন পূৰ্বে ১ অক্টোবৰ ধাৰ্য কৰা হৈছিল যদিও বিভাগীয় কর্তৃপক্ষই কাইলৈৰ পৰা ৰাষ্ট্ৰীয় উদ্যানখন পৰ্যটকৰ কাৰণে পুনৰ মুকলি কৰাৰ সিদ্ধান্ত গ্ৰহণ কৰিছে। ৰাষ্ট্ৰীয় উদ্যানখনৰ ক্ষেত্ৰ সঞ্চালক ড০ চি ৰমেশে এক জাননীযোগে এই কথা সদৰি কৰিছে। উল্লেখযোগ্য যে কাইলৈ ৰাজ্যৰ পৰ্যটন বিভাগে বড়োলেণ্ড পর্যটন বিভাগৰ সহযোগত মানসত বিশ্ব পৰ্যটন দিৱস উদযাপন কৰাৰ বাবে প্ৰস্তুতি ইতিমধ্যে সম্পূৰ্ণ কৰি তুলিছে। অর্থাৎ বিশ্ব পৰ্যটন দিৱসৰ সমান্তৰালভাৱে কাইলৈ পৰ্যটকৰ বাবে মানসৰ প্ৰৱেশদ্বাৰ মুকলি কৰা হ’ব। ৰাজ্যৰ পৰ্যটন বিভাগৰ মন্ত্ৰী জয়ন্ত মল্লবৰুৱা পৰ্যটন দিৱসৰ কাৰ্যসূচীত মুখ্য অতিথি হিচাপে উপস্থিত থাকিব। লগতে একেটা অনুষ্ঠানতে বি টি আৰৰ মুখ্য কাৰ্যবাহী সদস্য প্রমোদ বড়ো উপস্থিত থকাৰ কথাও আছে।