লেফটেনেণ্ট জেনেৰেল উপেন্দ্ৰ দ্বিৱেদীক পৰৱৰ্ত্তী স্থল সেনাধ্যক্ষ হিচাপে নিযুক্তি দিয়া হৈছে। অহা ৩০ জুনত তেওঁ কাৰ্যভাৰ গ্ৰহণ কৰিব। বৰ্তমানৰ স্থল সেনাধ্যক্ষ জেনেৰেল মনোজ পাণ্ডেৰ অৱসৰৰ বাবে শ্রী দ্বিৱেদীক তেওঁৰ স্থলাভিষিক্ত কৰা হ’ব। ১৯৬৪ চনৰ পহিলা জুলাইত জন্মগ্রহণ কৰা লেফটেনেণ্ট জেনেৰেল উপেন্দ্ৰ দ্বিৱেদীয়ে ১৯৮৪ চনৰ ১৫ ডিচেম্বৰত ভাৰতীয় সেনাৰ পদাতিক বাহিনী জম্মু-কাশ্মীৰ ৰাইফলছত যোগদান কৰিছিল। প্ৰায় ৪০ বছৰজোৰা দীঘলীয়া আৰু বিশিষ্ট সেৱা কালত তেওঁ বিভিন্ন পদত সেৱা আগবঢ়াইছে। স্থলসেনা বাহিনীৰ উপ-সেনা মুৰববী হিচাপে নিযুক্তি লাভ কৰাৰ পূৰ্বে লেফটেনেণ্ট জেনেৰেল দ্বিৱেদীয়ে ২০২২ৰ পৰা ২০২৪ চনলৈ পদাতিক বাহিনীৰ সঞ্চালক প্রধান আৰু উত্তৰ কামাণ্ডৰ মুখ্য কাৰ্যালয়ৰ জেনেৰেল অফিচাৰ কামাণ্ডিং ইন চীফসহ ভালেমান গুৰুত্বপূৰ্ণ পদত সেৱা আগবঢ়াই আহিছে।