লোকসভাত আজি বিত্ত বিধেয়ক ২০২৫ গৃহীত হয়। এই বিধেয়কখনৰ জৰিয়তে ২০২৫-২৬ বিত্তীয় বৰ্ষৰ বাবে কেন্দ্ৰীয় চৰকাৰৰ বিত্তীয় প্ৰস্তাৱসমূহক ফলপ্রসু কৰি তুলিব বিচৰা হৈছে।
বিধেয়কখন সন্দৰ্ভত হোৱা বিতৰ্কৰ উত্তৰ দি কেন্দ্ৰীয় বিত্তমন্ত্ৰী নিৰ্মলা সীতাৰমনে কয় যে কৰাতাসকলৰ সন্মানাৰ্থে আৰু ব্যৱসায় সূচল কৰি তোলাৰ উদ্দেশ্যে বিধেয়খনত অভূতপূৰ্ব কৰ ৰেহাই দিয়া হৈছে। তেওঁ কয় যে নতুন কৰ ব্যৱস্থাৰ অধীনত ১২ লাখ টকা পৰ্যন্ত আয়ৰ ক্ষেত্ৰত কোনো ধৰণৰ কৰ প্ৰযোজ্য নহয় সংসদৰ পৰৱৰ্তী বর্ষাকালীন অধিবেশনত নতুন আয়কৰ বিধেয়কক লৈ আলোচনা হব বুলি শ্রীমতী সীতাৰমনে ঘোষণা কৰে।
মন্ত্ৰীগৰাকীয়ে কয় যে, দেশৰ জনসাধাৰণৰ আশা আকাংক্ষা আৰু ২০৪৭ চনৰ ভিতৰত ভাৰতবৰ্ষক বিকশিত ৰাষ্ট্ৰৰূপে গঢ়ি তোলাৰ লক্ষ্য অনুযায়ী কেন্দ্ৰীয় চৰকাৰে বিত্ত বিধেয়কৰ জৰিয়তে ভালেমান ব্যৱস্থা গ্ৰহণ কৰিছে। তেওঁ কয় যে শুল্ক পৰিকাথামো যুক্তিসংগত কৰি তোলাই সীমা শুল্ক বিষয়ক বিধেয়কখনৰ মূল উদ্দেশ্য। ইয়াৰ ফলত নিৰ্মাণৰ সৈতে জড়িত গোটসমূহ উপকৃত হ’ব আৰু ৰপ্তানি বৃদ্ধি পাব বুলি শ্ৰীমতী সীতাৰমনে উল্লেখ কৰে। তেওঁ কয়, যে ২০২৫-২৬ বৰ্ষৰ বাজেটৰ জৰিয়তে কেচা সামগ্ৰীৰ ওপৰত আৰোপিত শুল্ক হ্ৰাস কৰি ঘৰুৱা উৎপাদন আৰু ৰপ্তানি বৃদ্ধিৰ লক্ষ্য নিৰ্ধাৰণ কৰা হৈছে। বিত্ত বিধেয়কত ঔদ্যোগিক সামগ্ৰীৰ বাবে সীমা শুল্কৰ ৭ প্ৰকাৰৰ হাৰ প্ৰত্যাহাৰৰ প্ৰস্তাৱ দিয়া হৈছে বুলি শ্ৰীমতী সীতাৰমনে জানিবলৈ দিয়ে। মন্ত্ৰীগৰাকীয়ে কয়, যে চৰকাৰে বৈদ্যুতিক বাহনৰ বাবে বেটাৰী উৎপাদনৰ প্ৰসাৰৰ উদ্দেশ্যে ৩৫ বিধ সামগ্ৰী কৰ ৰেহাইৰ তালিকাত অন্তৰ্ভুক্ত কৰাৰ প্ৰস্তাৱ দিয়া হৈছে। ইয়াৰ উপৰি মোবাইল ফোনৰ বেটাৰী নিৰ্মাণৰ বাবে ২৮ বিধ অতিৰিক্ত মূলধনী সামগ্ৰীক কৰ ৰেহাইৰ তালিকাত অন্তৰ্ভুক্ত কৰা হৈছে। ইয়াৰ পূৰ্বে আলোচনাত ভাগ লৈ কংগ্ৰেছৰ এছ জোথিমণিয়ে দেশত কর্মসংস্থাপনহীনতাৰ বিষয় উত্থাপন কৰি চৰকাৰে সাধাৰণ ৰাইজক সকাহ দিয়াৰ বাবে একোৱেই কৰা নাই বুলি অভিযোগ তোলে। তেওঁ কয় যে ১২ লাখ টকা পৰ্যন্ত কৰ ৰেহাই প্ৰদানৰ সিদ্ধান্তৰ পৰা মাত্র এক কোটি লোকেহে লাভান্বিত হ’ব। বিজেপিৰ জগদম্বিকা পালে কয় যে ভাৰতবৰ্ষক বিশ্বৰ সবাতোকৈ দ্রুত বিকাশশীল অৰ্থব্যৱস্থাৰ দেশৰূপে পৰিগণিত হৈছে । ইয়াৰ আগেয়ে মহাত্মা গান্ধী ৰাষ্ট্ৰীয় গ্ৰাম্য নিয়োগ নিশ্চিতকৰণ আঁচনি এম জি এনৰেগা পুঁজিৰ ধন মোকলাই নিদিয়াৰ বিষয় লৈ লোকসভাত কেইবাগৰাকী সাংসদে প্ৰতিবাদ সাব্যস্ত কৰে আৰু সংসদৰ কাম-কাজো ব্যাহত হয়।