লোকসভাত কালি ২০২৫-২৬ বৰ্ষৰ বাবে ৰে’ল মন্ত্ৰ্যালয়ৰ নিয়ন্ত্ৰণত থকা অনুদানৰ দাবী সন্দৰ্ভত আলোচনা অনুষ্ঠিত হয়। আলোচনাত অংশ লৈ কংগ্ৰেছৰ সাংসদ বৰ্ষা গাইকোৱাডে ৰে’ল যাত্ৰীৰ সুবিধা আৰু ৰে’ল দুর্ঘটনা সন্দৰ্ভত চৰকাৰক প্ৰশ্ন উত্থাপন কৰে। কংগ্ৰেছ নেত্ৰীগৰাকীয়ে শেহতীয়াকৈ নতুন দিল্লী ৰে’লৱে ষ্টেচনত পদপিষ্ট হৈ কেইবাজনো লোকে প্ৰাণ হেৰুওৱাৰ ঘটনা সন্দৰ্ভত প্রশ্ন তুলি শাসকীয় পক্ষক আক্ৰমণ কৰে। চৰকাৰে ভাৰতীয় ৰে’লক ব্যক্তিগতকৰণৰ প্ৰচেষ্টা চলাইছে বুলিও তেওঁ অভিযোগ কৰে। আলোচনাত অংশগ্ৰহণ কৰি তৃণমূল কংগ্ৰেছৰ সাংসদ শতাব্দী ৰয়ে যাত্ৰীসকলে অনলাইন টিকট বুকিঙত পোৱা অসুবিধা সন্দৰ্ভত আলোকপাত কৰে। দেশত হোৱা ৰে’ল দুৰ্ঘটনা সন্দৰ্ভতো তৃণমূল কংগ্ৰেছ দলৰ নেত্ৰীগৰাকীয়ে চৰকাৰক সমালোচনা কৰে । সমাজবাদী পাৰ্টীৰ নেতা লালজি বাৰ্মাই অযোধ্যা আৰু আজমগড়ৰ পৰা দিল্লীলৈ অধিক ৰে’ল চলাচলৰ বাবে দাবী জনায়। তেওঁ ৰে’ল যাত্ৰীসকলক আৰু ৰে’লৱে ষ্টেচনসমূহত অধিক সুবিধা আগবঢ়োৱাৰ ক্ষেত্ৰতো চৰকাৰৰ দৃষ্টি আকৰ্ষণ কৰে। বিজেপিৰ সাংসদ জনার্দন সিং ছিগৰিৱালে কেন্দ্ৰীয় বাজেটত ৰেলৰ আধুনীকিকৰণ, শক্তিশালী আন্তঃগাঁথনি নিৰ্মাণ আৰু যাত্ৰীৰ সুৰক্ষা আৰু নিৰাপত্তা নিশ্চিত কৰাৰ বাবে বাজেটত দুই লাখ ৬৫ হাজাৰ কোটি টকা ধাৰ্য্য কৰা বুলি অৱগত কৰে। তেওঁ কয়, যে চৰকাৰে ১০০ খন অমৃত ভাৰত ৰে’ল, ৫০ খন নমো ভাৰত ৰে’ল আৰু ২০০ খন বন্দে ভাৰত ৰে’ল চলাচল কৰোৱাৰ পৰিকল্পনা কৰিছে।