লখিমপুৰ জিলা আয়ুক্তৰ কাৰ্যালয়ত আজি শিশুৰ আৰ্থিক ভৱিষ্যত সুনিশ্চিত কৰিবলৈ কেন্দ্রীয় বিত্ত মন্ত্ৰীয়ে ১৮ ছেপ্তেম্বৰত নতুন দিল্লীত শুভাৰম্ভ কৰা এন পি এছ বাৎসল্য আঁচনি সন্দৰ্ভত নাবাৰ্ডৰ এখন সজাগতা সভা অনুষ্ঠিত হয়। নাবাৰ্ডৰ জিলা উন্নয়ন প্ৰৱন্ধকে আয়োজন কৰা সভাখনত জিলা ভাৰপ্ৰাপ্ত আয়ুক্তকে ধৰি চৰকাৰী উচ্চপদস্থ বিষয়াসকলে অংশগ্ৰহণ কৰে। ইয়াৰ লগতে পঞ্জাৱ নেচনেল বেংকৰ উত্তৰ লখিমপুৰ শাখাৰ বিষয়ববীয়া তথা জিলাখনৰ প্ৰায় ৩০খন বিদ্যালয় আৰু কনিষ্ঠ মহাবিদ্যালয়ৰ অধ্যক্ষৰ লগতে বিষয়ববীয়াসকলে অনুষ্ঠানটোত অংশগ্ৰহণ কৰে। উল্লেখযোগ্য যে এন পি এছ বাৎসল্য আঁচনিৰ জৰিয়তে অভিভাৱকসকলে নাবালক সন্তানৰ বাবে ৰাষ্ট্ৰীয় পেঞ্চন ব্যৱস্থাৰ একাউণ্ট খুলিব পাৰিব। শিশুৰ আৰ্থিক সুৰক্ষা সুনিশ্চিত কৰা এই পদক্ষেপৰ ক্ষেত্ৰত সৰ্বোচ্চ বিনিয়োগৰ সীমা নিৰ্ধাৰণ কৰা হোৱা নাই। সজাগতা সভাখনত নাবার্ডৰ জিলা উন্নয়ন প্ৰৱন্ধকগৰাকীয়ে আঁচনিখনৰ বিভিন্ন সুবিধাসমূহৰ বিষয়ে তথ্য সমৃদ্ধ উপস্থাপন আগবঢ়াই অভিভাৱকসকলক আঁচনিখনৰ সুবিধাসমূহ গ্ৰহণ কৰিবলৈ আহ্বান জনায়।