ৰাজ্যৰ তৃণমূল পৰ্যায়ৰ ক্ৰীড়া প্ৰতিভাসমূহক বিকাশৰ মঞ্চ হিচাপে গ্ৰহণ কৰি আয়োজন কৰা খেল মহাৰণৰ দ্বিতীয় সংস্কৰণৰ প্ৰতিযোগিতাসমূহ বিভিন্ন জিলাত আৰম্ভ হৈছে। কৃষি মন্ত্ৰী অতুল বৰাই আজি গোলাঘাট জিলাৰ বোকাখাতত খেল মহাৰণৰ কাৰ্যসূচীৰ অংশ হিচাপে চাইক্লিং প্রতিযোগিতাৰ ফ্লেগ অফ কৰে। বোকাখাত পৌৰসভা কার্যালয় চৌহদত অনুষ্ঠিত খেল মহাৰণৰ কাৰ্যসূচী উদ্বোধন কৰি মন্ত্ৰী শ্ৰীবৰাই খেল মহাৰণৰ জৰিয়তে গ্রামাঞ্চলৰ সুপ্ত প্ৰতিভাসমূহ বিকশিত হোৱাত সহায়ক হ’ব বুলি আশা প্ৰকাশ কৰে।
আনহাতে চৰাইদেউ জিলাতো গাঁও পঞ্চায়ত পৰ্যায়ৰ প্ৰতিযোগিতাসমূহ আনুষ্ঠানিকভাৱে শুভাৰম্ভ কৰা হয়। জিলাখনৰ সোণাৰি সমষ্টিৰ অন্তৰ্গত সোণাৰি গাঁও পঞ্চায়তৰ বিধায়ক ধৰ্মেশ্বৰ কোঁৱৰে প্ৰতিযোগিতাখন উদ্বোধন কৰে। এই উপলক্ষে আয়োজিত সভাত বিধায়কগৰাকীয়ে বিভিন্ন খেলৰ সৈতে জড়িত জিলাখনৰ খেলুৱৈসকলক এই প্ৰতিযোগিতাই ভৱিষ্যতে ক্রীড়া জগতখনত নিজৰ প্ৰতিভা প্ৰদৰ্শনত সহায় কৰিব বুলি আশা প্ৰকাশ কৰে।
বজালী জিলাৰ সৰুপেটাৰ বিধায়ক ফণীধৰ তালুকদাৰে গাঁও পঞ্চায়ত পৰ্যায়ত প্ৰতিযোগিতা উদ্বোধন কৰে। এই প্ৰতিযোগিতাত এথলেটিকছ, কাবাডী, ফুটবল, দবা, চাইকেল চলোৱা আদি খেলসমূহ অনুষ্ঠিত হয়।
দৰং জিলাতো গাঁও পঞ্চায়ত আৰু পৌৰসভা পৰ্যায়ত খেল মহাৰণৰ প্ৰতিযোগিতাসমূহ আৰম্ভ হৈছে। মঙলদৈ চৰকাৰী উচ্চতৰ মাধ্যমিক বিদ্যালয়ৰ খেলপথাৰত এই উপলক্ষে আয়োজিত অনুষ্ঠানত বিধায়ক বসন্ত দাসে জিলা আয়ুক্ত পৰাগ কুমাৰ কাকতিৰ উপস্থিতিত মঙলদৈ পৌৰসভা এলেকাত কাৰ্যসূচীৰ শুভাৰম্ভ কৰে।
যোৰহাট জিলাৰ বিভিন্ন প্ৰান্তত আজি খেল মহাৰণৰ দ্বিতীয় সংস্কৰণৰ বিভিন্ন প্রতিযোগিতাৰ শুভাৰম্ভ হয় ৷ তাৰে অংশ হিচাপে মৰিয়নি বিধানসভা সমষ্টিৰ অন্তৰ্গত নগাধূলি আৰু কঠালগুৰি চাহ বাগিচা খেলপথাৰত বিধায়ক ৰূপজ্যোতি কুৰ্মী, তিতাবৰ বিধানসভা সমষ্টিৰ অন্তৰ্গত তিতাবৰ ইউ এল বি আৰু মেজেঙা খেলপথাৰত বিধায়ক ভাস্কৰজ্যোতি বৰুৱা, যোৰহাট ষ্টেডিয়াম খেলপথাৰত জিলা আয়ুক্ত আৰু টীয়ক বিধানসভা সমষ্টিৰ অন্তর্গত বাহনা বালক উচ্চ মাধ্যমিক বিদ্যালয় খেলপথাৰত বিধায়কৰ প্ৰতিনিধিয়ে খেল মহাৰণৰ দ্বিতীয় সংস্কৰণৰ শুভাৰম্ভ কৰে।
কাৰ্বি আংলং আৰু পশ্চিম কাৰ্বি আংলং জিলাতো খেল মহাৰণৰ দ্বিতীয় সংস্কৰণৰ প্ৰতিযোগিতাসমূহ আৰম্ভ হৈছে। এই উপলক্ষে পশ্চিম কাৰ্বি আংলঙৰ হামৰেণ, ৰংহাং, ৰংবং খেলপথাৰত দুদিনীয়াকৈ চলিবলগীয়া পৰিষদীয় ভিত্তিত আৰম্ভ হোৱা খেল মহাৰণৰ প্ৰতিযোগিতা উদ্বোধন কৰে বিধায়ক ৰূপছিং টেৰণে। সেইদৰে কাৰ্বি আংলং জিলাৰ বোকাজানতো পৰিষদীয় সমষ্টি ভিত্তিত খেল মহাৰণৰ প্ৰতিযোগিতাসমূহ আৰম্ভ হৈছে।
কৰিমগঞ্জ জিলাৰ পাথাৰকান্দি বিধানসভা সমষ্টিৰ অন্তৰ্গত প্ৰতিটো গাঁও পঞ্চায়তত খেল মহাৰণৰ দ্বিতীয় সংস্কৰণৰ প্ৰতিযোগিতাসমূহ আনুষ্ঠানিকভাৱে উদ্বোধন কৰা হৈছে।