ভাৰতৰ পুৰুষ আৰু মহিলা উভয় দলে আজি ইংলেণ্ডৰ অ’লভাৰ হেমটনত আয়োজিত চলিত বৰ্ষৰ কাবাডী বিশ্বকাপ প্রতিযোগিতাত নিজ নিজ শাখাত অৱতীৰ্ণ হ’ব। মহিলাৰ দলটোৱে গ্ৰুপ ডিৰ এখন খেলত ৱেলছৰ মুখামুখি হোৱাৰ বিপৰীতে পুৰুষ দলটো গ্ৰুপ-বিৰ এখন খেলত স্কটলেণ্ডৰ বিৰুদ্ধে অৱতীৰ্ণ হ’ব। ভাৰতীয় সময় অনুসৰি খেল দুখন ক্ৰমে বিয়লি চাৰে পাঁচ বজাত আৰু নিশা চাৰে ১০ বজাত অনুষ্ঠিত হ’ব।
কালি আৰম্ভ হোৱা প্ৰতিযোগিতাখনত ভাৰতৰ পুৰুষ দলটোৱে ইতিমধ্যে জয়েৰে অভিযানৰ পাতনি মেলিছে। দলটোৱে প্ৰতিযোগিতাত নিজৰ প্ৰথমখন খেলত ইটালীক ৬৪-২২ ফলাফলত পৰাস্ত কৰে। প্ৰতিযোগিতাৰ উদ্বোধনী খেলখনত আয়োজক ইংলেণ্ডে হাংগেৰীৰ বিৰুদ্ধে ১০১-২৫ ফলাফলত বিজয় অর্জন কৰে।
প্রতিযোগিতাৰ বিগত সংস্কৰণৰ পুৰুষ আৰু মহিলা উভয় শাখাতে ভাৰতে খিতাপ অৰ্জন কৰিছিল। প্ৰতিযোগিতাত এইবেলি পুৰুষৰ শাখাত ভাগ লোৱা দহটা দলক গ্ৰুপ-এ আৰু বিত বিভক্ত কৰা হৈছে। ভাৰতক ইটালী, স্কটলেণ্ড, ৱেলছ আৰু হংকঙৰ সৈতে গ্ৰুপ বিত ৰখা হৈছে। গ্ৰুপ-এত আয়োজক ইংলেণ্ডৰ উপৰি হাংগেৰী, পোলেণ্ড, জার্মানী আৰু আমেৰিকা যুক্তৰাষ্ট্ৰক স্থান দিয়া হৈছে। মহিলাৰ শাখাত ভাগ লোৱা ছটা দলক গ্রুপ ডি আৰু ই হিচাপে ভাগ কৰা হৈছে। ভাৰতক ৱেলছ আৰু পোলেণ্ডৰ সৈতে গ্ৰুপ-ডিত ৰখা হৈছে। হংকং, হাংগেৰী আৰু ইংলেণ্ডক গ্রুপ-ইত স্থান দিয়া হৈছে।