আই পি এল ক্রিকেট প্রতিযোগিতাত আজি দিল্লীৰ অৰুণ জেটলী ষ্টেডিয়ামত হ’বলগীয়া এখন খেলত গুজৰাট টাইটানছ দেলহি কেপিটেলছৰ বিৰুদ্ধে অৱতীৰ্ণ হ’ব। খেলখন সন্ধিয়া চাৰে ৭ বজাত আৰম্ভ হ’ব।
ইফালে, লক্ষ্ণৌ ছুপাৰ জায়েণ্টছে যোৱানিশা চেন্নাইৰ এম এ চিদাম্বৰম ষ্টেডিয়ামত অনুষ্ঠিত এখন খেলত চেন্নাই ছুপাৰ কিংছক ৬ উইকেটত পৰাস্ত কৰে। খেলখনত চেন্নাই ছুপাৰ কিংছে প্রথমে বেট ধৰাৰ আমন্ত্ৰণ লাভ কৰি নিৰ্ধাৰিত ২০ অভাৰত ৬টা উইকেট হেৰুৱাই ২১০ ৰান কৰে। চেন্নাইৰ হৈ অধিনায়ক ৰুতুৰাজ গায়কোৱাডে সৰ্বাধিক ১০৮ ৰান কৰাৰ বিপৰীতে শিৱম ডুবেই ৬৬ ৰানৰ বৰঙণি আগবঢ়ায়। প্ৰত্যুত্তৰত লক্ষ্ণৌ ছুপাৰ জায়েণ্টছে ১৯ অভাৰ আৰু ৩টা বলত ৪ উইকেটৰ বিনিময়ত ২১৩ ৰান সংগ্ৰহ কৰে। লক্ষ্ণৌ ছুপাৰ জায়েণ্টছৰ হৈ মাৰ্কাছ ষ্টয়নিছে ৬৩টা বলত ১২৪ ৰান কৰি আউট নোহোৱাকৈ থাকে। কালিৰ জয়ৰ পাছত লক্ষ্ণৌ ছুপাৰ জায়েণ্টছ প্ৰতিযোগিতাৰ পইণ্ট তালিকাৰ চতুৰ্থ আৰু চেন্নাই পঞ্চম স্থানত আছে।