দেশৰ আগশাৰীৰ টেবুল টেনিছ খেলুৱৈ মণিকা বাট্ৰা মহিলাৰ ছিংগলছৰ বিশ্ব ৰেংকিঙত শীৰ্ষৰ ২৫গৰাকী খেলুৱৈৰ ভিতৰত স্থান লাভ কৰা প্ৰথমগৰাকী ভাৰতীয় মহিলা টেবুল টেনিছ খেলুৱৈ ৰূপে পৰিগণিত হৈছে। খেলুৱৈগৰাকীয়ে যোৱা সপ্তাহত অনুষ্ঠিত চৌদি স্মেছ প্রতিযোগিতাত দেখুওৱা প্ৰদৰ্শনৰ বাবে খেলুৱৈ জীৱনৰ সর্বশ্রেষ্ঠ ২৪সংখ্যক ৰেংকিং লাভ কৰিবলৈ সমৰ্থ হৈছে। খেলুৱৈগৰাকীয়ে লগতে টেবুল টেনিছৰ ছিংগলছত ভাৰতীয় খেলুৱৈয়ে সৰ্বোচ্চ ৰেংক অৰ্জন কৰা জি সাথিয়ানৰ পাঁচ বছৰীয়া অভিলেখো স্পৰ্শ কৰিছে। ২০১৮ চনৰ কমনৱেলথ গেমছৰ ব্যক্তিগত আৰু দলীয় শাখাত সোণৰ পদক লাভ কৰা মণিকা বাট্ৰাই জেদ্দাহত অনুষ্ঠিত চৌদি স্মেছ প্রতিযোগিতাত দেখুওৱা প্ৰদৰ্শনৰ ফলত ৰেংকিঙত ১৫টা স্থান ওপৰলৈ উঠিবলৈ সক্ষম হৈছে। বাট্ৰাই চৌদি স্মেছ প্ৰতিযোগিতাত কোৱাৰ্টাৰ ফাইনেলত প্ৰৱেশ কৰিছিল।