কেন্দ্ৰীয় ৰে‘লমন্ত্ৰী অশ্বিনী বৈষ্ণৱে কালি সন্ধিয়া নতুন দিল্লী ৰে‘লৱে ষ্টেচনত উপস্থিত হৈ উৎসৱৰ সময়ছোৱাত যাত্ৰীসকলৰ সুবিধা আৰু ভ্ৰমণ ব্যৱস্থাৰ পৰ্যালোচনা কৰে। প্লেটফৰ্মত ৰে‘লৰ বাবে অপেক্ষা কৰি থকা একাংশ যাত্ৰীৰ সৈতেও তেওঁ মত বিনিময় কৰে। যাত্ৰীসকলৰ একাংশই জনোৱা মতে, উপযুক্ত ভিৰ ব্যৱস্থাপনাৰ বাবে তেওঁলোকে ৰে‘ল আস্থানত সময়মতে উপস্থিত হোৱাত কোনো অসুবিধাৰ সন্মুখীন হোৱা নাই। ৰে‘লৱে সুৰক্ষা বাহিনী আৰু ৰে‘লৱেৰ বিষয়াসকলে উপযুক্তভাৱে ভিৰ পৰিচালনা কৰা বাবে মন্ত্ৰী শ্ৰীবৈষ্ণৱে সন্তোষ প্ৰকাশ কৰে । সাংবাদিকৰ সৈতে হোৱা কথা বতৰাত তেওঁ ৰে‘লৱেৰ বিষয়াসকলে যাত্ৰীসকলৰ ভ্ৰমণ মসৃন কৰি তুলিবলৈ গ্ৰহণ কৰা ব্যৱস্থাসমূহৰ বাবে বিষয়াসকলক প্ৰশংসা কৰে। শ্রীবৈষ্ণৱে সহযোগিতাৰ বাবে যাত্রীসকলকো ধন্যবাদ জ্ঞাপন কৰে। কেন্দ্ৰীয় ৰে‘লমন্ত্ৰীগৰাকীৰ মতে, যোৱা বছৰ দীপাৱলী আৰু ছট্‌ পূজা উপলক্ষে ভাৰতীয় ৰে‘লৱেই ৪হাজাৰ ৫০০ খন বিশেষ ৰে‘লৰ ব্যৱস্থা কৰিছিল। তেওঁ কোৱা মতে, এই বেলি যাত্ৰীসকলৰ সুবিধাৰ অৰ্থে ৭ হাজাৰ ৪৩৫ খন বিশেষ ৰে‘লৰ ব্যৱস্থা কৰা হৈছে। শ্রীবৈষ্ণৱে কয় যে, যোৱামাহৰ ৩১ তাৰিখলৈ এই বিশেষ ৰে‘লযোগে ৫১ লাখ লোকে নিজ গন্তব্য স্থানলৈ যাত্ৰা কৰিছে।