পেৰিছ অলিম্পিকত ভাৰতীয় পুৰুষ হকী দলে ব্ৰঞ্জৰ পদক লাভ কৰিছে। যোৱা নিশা হোৱা তৃতীয় স্থান নির্ণয়কাৰী খেলত ভাৰতে প্ৰথমে গ’ল খোৱাৰ পাছত স্পেইনক ২-১ গ’লৰ ব্যৱধানত পৰাস্ত কৰি ক্ৰমাগত দ্বিতীয়বাৰৰ বাবে অলিম্পিকত পদক লাভ কৰাৰ গৌৱৰ অৰ্জন কৰে। খেলৰ ১৮ মিনিটত মাৰ্ক মিৰালেছৰ গ’লেৰে স্পেইনে প্রথমে অগ্রগতি লয়। কিন্তু ভাৰতে শক্তিশালী প্ৰত্যাৱৰ্তন কৰি ৩০ আৰু ৩৩ মিনিটত অধিনায়ক হৰমনপ্রীত সিঙে দিয়া দুটা পেনাল্টি কর্ণাৰৰ গ’লৰ সহায়ত খেলখনত জয়লাভ কৰে। উল্লেখযোগ্য যে বিগত টকিঅ’ অলিম্পিকতো ভাৰতে ব্ৰঞ্জৰ পদক লাভ কৰিছিল। ভাৰতে অন্তিমবাৰৰ বাবে হকীত ১৯৬৮ আৰু ১৯৭২ চনত ক্রমাগত দুখন অলিম্পিকত জয়লাভ কৰিছিল। ইফালে অলিম্পিকত ব্রঞ্জ অর্জন কৰিয়ে ৩৬ বছৰীয়া ভাৰতীয় দলৰ গ’লৰক্ষক শ্ৰীজেশে ১৮ বছৰৰ কেৰিয়াৰৰ অন্ত পেলাই অৱসৰ গ্ৰহণ কৰে। উল্লেখযোগ্য যে পেৰিছত পদক জয়ৰ সফলতাৰে ভাৰতীয় পুৰুষ হকী দলে অলিম্পিকৰ ইতিহাসত ৮টা সোণসহ মুঠ ১৩ টা পদক লাভ কৰিছে।
হকী ইণ্ডিয়াই পেৰিছ অলিম্পিকত ব্ৰঞ্জৰ পদক অৰ্জন কৰা ভাৰতীয় পুৰুষ হকী দলৰ প্ৰতিগৰাকী খেলুৱৈলৈ ১৫ লাখ টকাকৈ আৰু সহায়ক দলৰ প্ৰতিগৰাকী সদস্যলৈ ৭.৫০ লাখ টকাৰ নগদ ধন আগবঢ়োৱাৰ কথা ঘোষণা কৰিছে।