দক্ষিণ আফ্রিকাই যোৱা নিশা এণ্টিগুৱাৰ ছাৰ ভিভিয়ান ৰিচাৰ্ডছ ষ্টেডিয়ামত অনুষ্ঠিত আই চি চি বিশ্বকাপ ক্ৰিকেট প্ৰতিযোগিতাৰ ছুপাৰ এইট পৰ্যায়ৰ প্ৰথমখন খেলত আমেৰিকা যুক্তৰাষ্ট্ৰক ১৮ ৰাণত পৰাস্ত কৰে। আমেৰিকাই ১৯৫ ৰাণৰ বিজয় লক্ষ্যৰে খেলি নিৰ্ধাৰিত ২০ অভাৰত ৬টা উইকেটৰ বিনিময়ত ১৭৬ ৰাণহে কৰিবলৈ সমৰ্থ হয়। আমেৰিকাৰ হৈ এন্ড্ৰিজ গ’ছে ৮০ ৰাণ কৰি অপৰাজিত হৈ ৰয়। হৰমিত সিঙে ৩৮ ৰাণৰ বৰঙণি আগবঢ়ায়। দক্ষিণ আফ্রিকাৰ কাগিছো ৰাবাডাই তিনিটা উইকেট দখল কৰাৰ বিপৰীতে কেশৱ মহাৰাজ, এনৰিক নাৰ্খিয়া আৰু টবৰেজ ছামচিয়ে এটাকৈ উইকেট লাভ কৰে। ইয়াৰ পূৰ্বে দক্ষিণ আফ্ৰিকাই প্রথমে বেট ধৰাৰ আমন্ত্ৰণ লাভ কৰি নিৰ্ধাৰিত ২০ অভাৰত চাৰি উইকেটৰ বিনিময়ত ১৯৪ ৰাণ কৰে। দক্ষিণ আফ্ৰিকাৰ হৈ কুইণ্টন ডি ককে ৭৪ ৰাণ আৰু এডেন মার্কৰমে ৪৬ ৰাণৰ বৰঙণি আগবঢ়ায়। কুইণ্টন ডি ককক প্লেয়াৰ অৱ দ্য মেচ ঘোষণা কৰা হয়।
বাৰবাডোছত হ’বলগীয়া ছুপাৰ এইট পৰ্যায়ৰ আজিৰ দ্বিতীয়খন খেলত ভাৰত আফগানিস্তানৰ সন্মুখীন হ’ব। খেলখন ভাৰতীয় সময় অনুসৰি নিশা ৮ বজাত আৰম্ভ হ’ব।