ৰাজ্যৰ বিভিন্ন স্থানত সদৌ ভাৰত অসামৰিক প্ৰতিৰক্ষা আৰু গৃহৰক্ষী বাহিনীৰ ৬২ সংখ্যক দিৱস আজি উদযাপন কৰা হয়। গুৱাহাটীৰ নিকটৱৰ্তী পানীখাইতীৰ কেন্দ্ৰীয় গৃহৰক্ষী বাহিনীৰ প্ৰশিক্ষণ কেন্দ্ৰত আয়োজিত গৃহৰক্ষী বাহিনী দিৱসত ৰাজ্যপাল লক্ষ্মন প্ৰসাদ আচাৰ্য্য আৰু অসম আৰক্ষীৰ সঞ্চালকপ্ৰধান জি পি সিঙে অংশগ্ৰহণ কৰে। দিৱস উপলক্ষে পেৰেড আৰু দুঃসাহসিক ক্ৰীড়াও প্ৰদৰ্শন কৰা হয়। তিনিচুকীয়া জিলাতো অসামৰিক প্ৰতিৰক্ষা বিভাগৰ উদ্যোগত গৃহৰক্ষী বাহিনী দিৱস উদযাপন কৰা হয়। দিৱস উপলক্ষে পুৱা চাফাই অভিযান আয়োজিত হোৱাৰ লগতে গছপুলি ৰোপণ কাৰ্যসূচী ৰূপায়ণ কৰা হয়। ইয়াৰ লগতে জিলা আয়ুক্তৰ কাৰ্যালয়ৰ পৰা সজাগতা সমদল উলিওৱা হয়। বিয়লি স্বেচ্ছাসেৱকসকলে দুর্যোগ প্রশমন, সজাগতাৰ আখৰা কৰে।