♦ আসন্ন লোকসভা নিৰ্বাচনৰ পৰিপ্ৰেক্ষিতত যোৰহাট নির্বাচনী জিলাত এবছেণ্টি ভোটদাতাসকলৰ বাবে গৃহ ভোটদানৰ ব্যৱস্থা কৰা হৈছে। যোৰহাট লোকসভা সমষ্টিত প্রথম পর্যায় অর্থাৎ ১৯ এপ্ৰিলত অনুষ্ঠিত হ’বলগীয়া ভোট গ্রহণৰ বাবে কাইলৈৰ পৰা ৫ এপ্ৰিললৈকে এবছেণ্টি ভোটদাতাসকলৰ গৃহ ভোটদান প্রক্রিয়া অব্যাহত থাকিব। উল্লেখযোগ্য যে ৮৫ বছৰৰ উৰ্ধৰ ভোটদাতা আৰু বিশেষভাৱে সক্ষম ভোটদাতাসকলক এবছেণ্টি ভোটদাতাৰ তালিকাত সন্নিৱিষ্ট কৰি ঘৰতে ভোটগ্ৰহণৰ ব্যৱস্থা কৰা হৈছে।
এই ব্যৱস্থাৰ অধীনত যিসকল ব্যক্তিয়ে 12-D প্ৰ-পত্ৰ পূৰণ কৰিছে, তেওঁলোকে উল্লেখ কৰা ঠিকনাত পলিং বিষয়াসকল উপস্থিত হৈ পোষ্টেল বেলটৰ জৰিয়তে ভোটদান সাব্যস্ত কৰা হ’ব। এই প্ৰক্ৰিয়াত প্ৰতিগৰাকী এবছেণ্টি ভোটদাতাৰ ঘৰলৈ এজন সূক্ষ্ম পৰ্যৱেক্ষক, দুগৰাকী প’লিং বিষয়া, এজন ভিডিঅ’ গ্ৰাফাৰ আৰু দুগৰাকী আৰক্ষী যাব আৰু নিৰ্ধাৰিত প্রক্রিয়া অনুসৰি ভোটদাতাগৰাকীয়ে ভোটদান সাব্যস্ত কৰিব পাৰিব। উল্লেখযোগ্য যে প্ৰতিগৰাকী এবছেণ্টি ভোটদাতাক সুৰক্ষিতভাৱে নিজৰ ভোটদানৰ অধিকাৰ সাব্যস্ত কৰাৰ ক্ষেত্ৰত সুবিধা প্ৰদানৰ উদ্দেশ্যে ভাৰতৰ নির্বাচন আয়োগে এই পদক্ষেপ গ্ৰহণ কৰিছে।