কেন্দ্ৰীয় গ্ৰাহক সুৰক্ষা প্ৰাধিকৰণে অভিভাৱক আৰু প্ৰাৰ্থীসকল বিপথে পৰিচালিত হোৱাৰ পৰা ৰক্ষা কৰাৰ উদ্দেশ্যে প্ৰশিক্ষণ প্ৰতিষ্ঠানসমূহে শিক্ষাৰ্থী আৰু পাঠ্যক্ৰমৰ বিষয়ে যাৱতীয় তথ্য প্ৰদান কৰিব লাগে বুলি নীতি-নিৰ্দেশনা জাৰি কৰিছে। এই অনুসৰি, প্ৰশিক্ষণ প্ৰতিষ্ঠানসমূহে অস্বীকাৰমূলক ঘোষণা আৰু স্পষ্টীকৰণ স্পষ্টভাৱে প্ৰদৰ্শন কৰিব লাগিব আৰু বাছনি লাভ কৰাৰ পাছতহে অনুমতি সাপেক্ষে সফল প্ৰাৰ্থীসকলৰ ফটো ব্যৱহাৰ কৰিব পাৰিব। নীতি-নিৰ্দেশনা অনুসৰি, প্ৰতিষ্ঠানসমূহে নিজৰ সেৱা, সুবিধা আৰু আন্তঃগাঁথনিৰ বিষয়ে সঠিকভাৱে ঘোষণা কৰিব লাগিব। গ্রাহক পৰিক্ৰমা বিভাগৰ সচিব নিধি খাড়েই আজি নতুন দিল্লীত বিভিন্ন প্ৰশিক্ষণ প্রতিষ্ঠানে ব্যৱহাৰ কৰা বিভ্ৰান্তিকৰ বিজ্ঞাপনৰ বিৰুদ্ধে এলানি নীতি-নিৰ্দেশনা জাৰি কৰি কয়, যে প্ৰশিক্ষণ প্ৰতিষ্ঠানসমূহৰ গ্ৰাহকসকলৰ ওজৰ-আপত্তি নিষ্পত্তিৰ সক্ৰিয় ব্যৱস্থা থকা উচিত। ৰাষ্ট্ৰীয় গ্ৰাহক হেল্পলাইন আৰম্ভ হোৱাৰে পৰা যোৱা বছৰ ছেপ্তেম্বৰৰ পৰা চলিত বছৰৰ আগষ্টলৈকে বিভিন্ন সংস্থাই ১ কোটিৰো অধিক টকা ঘূৰাই দিছে বুলি তেওঁ মন্তব্য কৰে।