লোকসভা নিৰ্বাচনৰ প্ৰস্তুতিৰ অংশ হিচাপে গুৱাহাটী মহানগৰৰ দিছপুৰত থকা লোক নিৰ্মাণ বিভাগৰ সন্মিলন আৰু প্ৰশিক্ষণ কেন্দ্ৰত কালি কামৰূপ মহানগৰ জিলাৰ নিৰ্বাচন এলেকাৰ বাবে ই ভি এম ব্যৱহাৰৰ যাৱতীয় প্রশিক্ষণ অনুষ্ঠিত হয়। প্ৰশিক্ষণত ৮০ গৰাকী প্ৰশিক্ষাৰ্থীক জিলা আৰু ৰাষ্ট্ৰীয় পৰ্যায়ৰ প্ৰশিক্ষকে ই ভি এম পৰিচালনাৰ বিভিন্ন দিশ সম্পৰ্কে অৱগত কৰে। মৰিগাঁও জিলাত নিৰ্বাচনৰ বাবে নিয়োজিত ১৫৩ গৰাকী মহিলা ভোটগ্রহণকাৰী বিষয়াৰ প্ৰশিক্ষণ সম্পন্ন হৈছে। জিলাখনত নিৰ্বাচনৰ বাবে নিয়োজিত বিষয়া-কৰ্মচাৰীৰ দ্বিতীয় পৰ্যায়ৰ প্ৰশিক্ষণৰ কালি সামৰণি পৰে। অন্তিম দিনা ৮ গৰাকী বিশেষভাৱে সক্ষম মহিলাকে ধৰি মহিলা ভোটগ্রহণকাৰী বিষয়াসকলৰ প্ৰশিক্ষণ সম্পন্ন হয়।