বিদেশ মন্ত্রী ড০ এছ জয়শংকৰে তেওঁৰ মৰিছাছ ভ্ৰমণৰ অংশৰূপে আজি দেশখনৰ প্ৰাক্তন প্রধানমন্ত্রীদ্বয় ড০ নবীন ৰামগুলাম আৰু পল বাৰেংগাৰক সাক্ষাৎ কৰে। ড০ ৰামগুলামক সাক্ষাৎ কৰাৰ পাছত শ্ৰীজয়শংকৰে কয় যে, তেওঁলোকে দীৰ্ঘদিনীয়া দ্বিপাক্ষিক অংশীদাৰিত্ব আৰু ইয়াৰ ব্যাপক সম্ভাৱনীয়তাৰ বিষয়ে আলোচনা কৰে। শ্ৰীপলৰ সৈতে হোৱা আলোচনাৰ বিষয়ে বিদেশ মন্ত্ৰীগৰাকীয়ে কয় যে দুয়ো সম-সাময়িক গোলকীয় বিষয়সমূহৰ বিষয়ে আলোচনা কৰে। ড০ জয়শংকৰে বিৰোধী দলপতি ড০ অৰৱিন বুলেলকো সাক্ষাৎ কৰে। দুয়োগৰাকী নেতাই ভাৰত-মৰিছাছৰ সম্পৰ্ক আৰু ভাৰত মহাসাগৰ অঞ্চলৰ সমৃদ্ধি আৰু উন্নয়নৰ বিষয়ে আলোচনা কৰে। মন্ত্ৰীগৰাকীয়ে মৰিছাছৰ ছ’ছিয়েল ডেম’ক্ৰেটৰ নেতা জেভিয়াৰ লুক ডোভালকো সাক্ষাৎ কৰে।