পোহৰৰ উৎসৱ দীপাৱলী আৰু কালী পূজালৈ মাজত মাথো দুটা দিন বাকী থকা অৱস্থাত ৰাজ্যৰ বজাৰসমূহত দেশী-বিদেশী আটচবাজি আৰু থলুৱা মৃৎশিল্পীৰ দ্বাৰা নিৰ্মিত বিভিন্ন ৰং-বিৰঙী চাকিৰে ভৰি পৰিছে । ৰাজ্যৰ ভিন্ন প্ৰান্তৰ লগতে গোলাঘাট জিলাতো মাটিৰ চাকিৰ লগতে কালী গোসাঁনীৰ মৃন্ময় মূৰ্তি প্ৰস্তুত কৰাত শিল্পীসকল ব্যস্ত হৈ পৰিছে। জিলাখনত উৎসৱৰ সময়ছোৱাত যাতে কোনো অপ্রীতিকৰ ঘটনা নঘটে তাৰবাবে জিলা প্রশাসনে যাৱতীয় ব্যৱস্থা গ্ৰহণ কৰিছে। ইপিনে, থলুৱা আতচবাজি উদ্যোগৰ বাবে বিখ্যাত বৰপেটা জিলাতো দীপাৱলী আৰু কালীপূজাৰ প্ৰস্তুতি পূর্ণ গতিত অব্যাহত আছে।
ধুবুৰী জিলাতো দীপাৱলী উপলক্ষে মৃৎ শিল্পীসকল ব্যস্ত হৈ পৰিছে বুলি আমাৰ সংবাদদাতাই প্ৰকাশ কৰিছে। উল্লেখযোগ্য যে পৰম্পৰাগত মৃৎ শিল্পৰ বাবে জনাজাত জিলাখনৰ গৌৰীপুৰৰ ঐতিহাসিক আচাৰীকান্দি টেৰাকোটা শিল্প গাঁৱৰ মুঠ ১৬০ টা পৰিয়াল বিভিন্ন ধৰণৰ মাটিৰ চাকি নিৰ্মাণত ব্যস্ত হৈ পৰিছে। তদুপৰি টেৰাকোটাত প্রস্তুত কৰা মাটিৰ চাকিসমূহ ৰাজ্যৰ বিভিন্ন প্ৰান্তলৈ প্ৰেৰণ কৰা হৈছে।