ডিব্ৰুগড় জিলা আয়ুক্তৰ কাৰ্যালয়ত আজি বানৰ সময়ছোৱাত ল’বলগীয়া বিভিন্ন কাৰ্যব্যৱস্থাৰ প্ৰস্তুতি সন্দৰ্ভত এখন পর্যালোচনা সভা অনুষ্ঠিত হয়। ৰাজ্য চৰকাৰৰ ৰাজহ আৰু দুৰ্যোগ ব্যৱস্থাপনা বিভাগৰ উপ-সচিব আৰু ৰাজ্যিক দুর্যোগ ব্যৱস্থাপনা বিভাগৰ প্ৰকল্প সমন্বয়ক অলকানন্দা মেধিৰ উপস্থিতিত অনুষ্ঠিত সভাত খহনীয়া প্ৰতিৰোধৰ বিষয়ে আলোচনা কৰা হয়। পর্যালোচনা সভাত ডিব্ৰুগড়ৰ অতিৰিক্ত জিলা আয়ুক্ত ডাঃ মণিকা বৰাৰ লগতে বিভিন্ন ৰাজহ চক্ৰৰ চক্ৰবিষয়াসকল উপস্থিত থাকে। পর্যালোচনা বৈঠকৰ অন্তত সংশ্লিষ্ট বিভাগৰ বিষয়াসকলে মোহনাঘাট, আইধান আৰু টিংখাং মাটিকটাৰ খহনীয়াপীড়িত অঞ্চল পৰিদৰ্শন কৰে। দলটোৱে লগতে বিন্ধাকটাৰ আদৰ্শ সাহায্য শিবিৰ, ডিব্ৰুগড় পূব ৰাজহ চক্ৰৰ অন্তৰ্গত লাহোৱালৰ এন ডি আৰ এফৰ আঞ্চলিক সঁহাৰি কেন্দ্ৰ, মইনাজান আৰু পৌৰনিগমৰ সমীপৰ পানী নিষ্কাশনৰ স্থান আৰু এছ ডি আৰ এফৰ অধীনত ৰহমৰীয়াত চলি থকা ব্ৰহ্মপুত্ৰ নদীৰ পাৰৰ সুৰক্ষাৰ কাম-কাজৰ বুজ লয়।