প্ৰতিৰক্ষা মন্ত্ৰী ৰাজনাথ সিঙে কৈছে যে, প্ৰথমবাৰৰ বাবে দেশৰ প্ৰতিৰক্ষা ৰপ্তানীয়ে ২০২৩-২৪ চনত ২১ হাজাৰ কোটি টকা অতিক্ৰম কৰিছে। সামাজিক মাধ্যমৰ এটা বাৰ্তাৰ জৰিয়তে শ্রীসিঙে কয় যে, যোৱাটো বিত্তীয় বৰ্ষত প্ৰতিৰক্ষা ৰপ্তানি খণ্ডত বৃদ্ধিৰ হাৰ আছিল ৩২ শতাংশৰো অধিক আছিল। প্ৰতিৰক্ষা মন্ত্ৰ্যালয়ে ভাৰতৰ প্ৰতিৰক্ষা উৎপাদন আৰু ৰপ্তানিক আগুৱাই নিবলৈ বিভিন্ন ধৰণৰ পদক্ষেপ গ্ৰহণ কৰা বুলিও শ্রীসিঙে উল্লেখ কৰে। তেওঁ লগতে কয় যে, দেশৰ ব্যক্তিগত খণ্ড আৰু প্ৰতিৰক্ষা ৰাজহুৱা খণ্ডৰ অন্তৰ্গত প্ৰতিৰক্ষা উদ্যোগসমূহে যোৱা কেইটামান বছৰত উৎকৃষ্ট প্ৰদৰ্শন দেখুৱাবলৈ সমৰ্থ হৈছে। মন্ত্ৰীগৰাকীয়ে এই খণ্ডৰ লগত জড়িত প্ৰতিজন অংশীদাৰলৈ প্ৰতিৰক্ষা ৰপ্তানিৰ ক্ষেত্ৰত স্থাপন কৰা এই মাইলৰ খুটিৰ বাবে অভিনন্দন জ্ঞাপন কৰে।