মুখ্যমন্ত্রী ড° হিমন্ত বিশ্ব শৰ্মাই আজি ডিব্ৰুগড়ৰ মুখ্যমন্ত্ৰীৰ সচিবালয়ৰ চৌহদত জিলাখনৰ কৃত্ৰিম বানৰ সমস্যা আৰু ইয়াৰ সমাধান সন্দৰ্ভত এখন গুৰুত্বপূৰ্ণ বৈঠকত মিলিত হয়। বৈঠকত ডিব্ৰুগড় পৌৰসভা, চহৰ আৰু নগৰ পৰিকল্পনা বিভাগকে ধৰি বিভিন্ন বিভাগৰ বিষয়াসকলৰ উপৰি কেবিনেট মন্ত্ৰী প্ৰশান্ত ফুকন উপস্থিত থাকে। ড° শর্মাই নগৰখনত নিৰ্মাণ হৈ থকা মূল নলাৰ উপৰি অন্যান্য নলা-নৰ্দমাসমূহৰ নিৰ্মাণকাৰ্য শীঘ্ৰেই সম্পূৰ্ণ কৰিবলৈ সংশ্লিষ্ট বিভাগক নির্দেশ দিয়ে। কৃত্রিম বানে যাতে জনসাধাৰণক বিপর্যস্ত কৰিব নোৱাৰে তাৰ বাবে জাৱৰ নিষ্কাষণকে ধৰি আনুষংগিক কামসমূহ শীঘ্ৰেই সম্পন্ন কৰিবলৈ মুখ্যমন্ত্ৰীয়ে বিভাগীয় কর্তৃপক্ষক নির্দেশ দিয়ে। এই বৈঠকতে মুখ্যমন্ত্ৰীগৰাকীয়ে বিগত বৰ্ষৰ ২৩ ডিচেম্বৰত এই বিষয়ক এখন বৈঠকত গ্ৰহণ কৰা সিদ্ধান্তসমূহৰ কাৰ্যকৰীকৰণৰ সন্দৰ্ভত গৃহ নিৰ্মাণ আৰু নগৰ পৰিক্ৰমা বিভাগে প্ৰস্তুত কৰা প্ৰতিবেদনৰ বিতংভাৱে পৰ্যালোচনা কৰে। ড° শৰ্মাই আজি বিধায়কসকলৰ সমন্বিতে ডিব্ৰুগড়ত বিধানসভা ভৱন আৰু বিধায়কৰ আৱাসগৃহ নিৰ্মাণৰ বাবে ভূমি পৰিদৰ্শন কৰে।