মুখ্যমন্ত্রী ড° হিমন্ত বিশ্ব শৰ্মাৰ উপস্থিতিত আজি যোৰহাটত প্ৰায় ১১১ কোটি টকা ব্যয় সাপেক্ষ কেইবাটাও ৰাজহুৱা প্ৰকল্পৰ উদ্বোধন কৰা হ‘ব। মুখ্যমন্ত্ৰীয়ে ৫৮১ মিটাৰ দৈৰ্ঘ্যৰ কমাৰবন্ধা আলি ৰে‘লৱে উৰণ সেতু, সম্পূর্ণ স্বয়ংক্রিয় পৰীক্ষা আৰু অত্যাধুনিক সা-সঁজুলি সম্পন্ন স্বয়ংক্রিয় যান-বাহন উপযোগিতা পৰীক্ষণ কেন্দ্ৰ আৰু ১২০ খন আসনযুক্ত আলোচনা কক্ষ, সংবাদ সন্মিলন কক্ষ ইত্যাদি সংলগ্ন যোৰহাট সন্মিলন কেন্দ্ৰটো আজি ৰাইজলৈ উৎসৰ্গিত কৰিব। ইয়াৰে উৰণ সেতুখন ৭৮ কোটি ২৭ লাখ, যান-বাহন পৰীক্ষা কেন্দ্ৰটো ১২ কোটি ৫০ লাখ আৰু সন্মিলন কেন্দ্ৰটো ২০ কোটি টকা ব্যয়ৰে নিৰ্মাণ কৰি উলিওৱা হৈছে। মন্ত্ৰী অজন্তা নেওগ আৰু যোগেন মহনৰ লগতে বিধায়ক হিতেন্দ্র নাথ গোস্বামী, ৰূপজ্যোতি কুৰ্মী তথা ভাস্কৰ জ্যোতি বৰুৱা আৰু অসম ৰাজ্যিক পৰিবহন নিগমৰ অধ্যক্ষ পল্লব লোচন দাস এই কাৰ্যসূচীত উপস্থিত থকাৰ কথা ৷