সদ্য সমাপ্ত হাইস্কুল শিক্ষান্ত পৰীক্ষাৰ সমাজ বিজ্ঞান বিষয়ৰ উত্তৰবহীত পৰিক্ষাৰ্থীসকলক অতিৰিক্ত নম্বৰ প্ৰদান কৰা হ’ব বুলি মুখ্যমন্ত্রী ড° হিমন্ত বিশ্ব শর্মাই প্ৰকাশ কৰিছে। মুখ্যমন্ত্ৰীগৰাকীয়ে কালি সামাজিক মাধ্যমযোগে এই কথা প্রকাশ কৰি কয়, যে এইবাৰ হাইস্কুল শিক্ষান্ত পৰীক্ষাৰ সমাজ বিজ্ঞানৰ প্ৰশ্নকাকতখন জটিল হোৱা বুলি বৰপেটা, বৰদোৱা ভ্ৰমণ কৰাৰ সময়ত তেওঁক শিক্ষাৰ্থীসকলে ওজৰ-আপত্তি দিছিল। শিক্ষাৰ্থীসকলৰ এই অভিযোগৰ ভিত্তিত তেওঁ বিষয়টো পৰ্যালোচনা কৰিবলৈ ছেবাৰ অধ্যক্ষক পৰামৰ্শ দিয়া বুলি উল্লেখ কৰিছে। ছেবাৰ অধ্যক্ষগৰাকীৰ উদ্ধৃতিৰে মুখ্যমন্ত্ৰী ড° শৰ্মাই কয়, যে সমাজ বিজ্ঞানৰ প্ৰশ্নকাকতখনৰ শৈলী যোৱা বছৰৰ পৰা কিছু সালসলনি কৰা হৈছে। ছাত্ৰ-ছাত্ৰীসকলৰ সাধাৰণ জ্ঞানৰ পৰীক্ষা লোৱাৰ ব্যৱস্থা হিচাপে এনে কৰা ভাল হৈছে যদিও ইয়াৰ ফলত যদি শিক্ষাৰ্থীসকলক পৰীক্ষাত অনুত্তীর্ণ হ’বলগীয়া হয় তেন্তে সেয়া দুখৰ কথা হ’ব বুলি উল্লেখ কৰিছে। সেয়ে অন্যান্য বিষয়ৰ পৰীক্ষা ভাল হোৱা পৰিক্ষাৰ্থীসকলক সমাজ বিজ্ঞানৰ পৰীক্ষাত অতিৰিক্ত নম্বৰৰ সুবিধা কৰি দিবলৈ ছেবাৰ অধ্যক্ষগৰাকীক তেওঁ অনুৰোধ জনাইছে বুলি সদৰি কৰিছে।
আনহাতে অহা ২০ মাৰ্চত ডিব্ৰুগড়ত অনুষ্ঠিত হ’বলগীয়া মন্ত্ৰীসভাৰ বৈঠকত ৫০ গৰাকী ছাত্ৰ-ছাত্ৰী থকা ৰাজ্যৰ প্ৰাথমিক বিদ্যালয়সমূহতো প্রধান শিক্ষকৰ পদ সৃষ্টিৰ বিষয়টো আলোচনা কৰি এই বিষয়ত সিদ্ধান্ত লোৱা হ’ব বুলি তেওঁ প্ৰকাশ কৰিছে ।