অসম এতিয়াৰে পৰা আন্তঃৰাষ্ট্ৰীয় পৰ্যায়ত কেৱল ঐতিহ্যপূৰ্ণ চাহৰ বাবেই নহয় ছেমি কণ্ডাক্টৰ উদ্যোগৰ বাবেও পৰিচিত হ‘ব বুলি মুখ্যমন্ত্রী ড° হিমন্ত বিশ্ব শৰ্মাই প্ৰকাশ কৰিছে। নতুন দিল্লীৰ ভাৰত মণ্ডপমত আজি আয়োজিত এটা অনুষ্ঠানত এটা অনুষ্ঠানত মুখ্যমন্ত্ৰীয়ে এই বিষয়ে প্ৰকাশ কৰে। তেওঁ কয় যে এই বছৰৰ শেষৰ ফালে জাগীৰোডৰ ছেমি কণ্ডাক্টৰ প্ৰকল্পত কাম-কাজ আৰম্ভ হ‘ব।
মুখ্যমন্ত্রীয়ে কয় যে কেন্দ্রীয় চৰকাৰে উত্তৰ পূৰ্বাঞ্চলত ১ লাখ কোটি টকা ব্যয়েৰে পথ আন্তঃগাঁথনি নিৰ্মাণ কৰি আছে। এই বছৰৰ ছেপ্তেম্বৰৰ ভিতৰত গুৱাহাটী বিমান বন্দৰক দেশৰ অন্যান্য মুখ্য মহানগৰীসমূহৰ বিমান বন্দৰৰ লেখিয়াকৈ অত্যাধুনিক সা-সুবিধাৰে সাজু কৰি তোলা হ‘ব বুলি মুখ্যমন্ত্ৰীয়ে প্ৰকাশ কৰে। প্রধানমন্ত্ৰী নৰেন্দ্ৰ মোদীয়ে অসমৰ লগতে উত্তৰ পূৰ্বাঞ্চলক অষ্টলক্ষ্মী বুলি অভিহিত কৰি প্ৰথমৰে পৰাই অঞ্চলটোৰ উন্নয়নত অগ্ৰাধিকাৰ দি আহিছে বুলি ড° শৰ্মাই মন্তব্য কৰে। তেওঁ কয় যে ২০১৪ চনত নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে শাসনভাৰ গ্ৰহণ কৰাৰ পাছৰে পৰা অসমৰ শান্তি-শৃংখলা পৰিস্থিতি উন্নত হোৱাৰ লগতে লগতে সমগ্ৰ উত্তৰ-পূবত অভূতপূর্ব উন্নয়নৰ সূচনা হৈছে বুলি ড° শৰ্মাই উল্লেখ কৰে।