অসম বিধানসভাত কালি দাখিল হোৱা ২০২৫-২৬ বিত্তীয় বৰ্ষৰ বাজেটক লৈ শাসক-বিৰোধীৰ মিশ্রিত প্ৰতিক্ৰিয়া পৰিলক্ষিত হৈছে। শাসনধিস্থিত বিজেপিৰ লগতে মিত্রদল অসম গণ পৰিষদে বাজেটখনক জনমুখী আখ্যা দিছে। বাজেটখনে জনসাধাৰণৰ জীৱন যাত্ৰা সহজ কৰি ৰাজ্যখনৰ উন্নয়নক নতুন গতি দিব বুলি মুখ্যমন্ত্রী ড° হিমন্ত বিশ্ব শৰ্মাই প্রকাশ কৰিছে। মুখ্যমন্ত্ৰীয়ে কালি এখন সংবাদমেল সম্বোধন কৰি কয়, যে ২০১৫ চনৰ পৰা ৰাজ্যখনৰ মুঠ ঘৰুৱা উৎপাদন ৰাষ্ট্ৰীয় মুঠ ঘৰুৱা উৎপাদনৰ তুলনাত বৃদ্ধি পাইছে। দাখিল কৰা বাজেট অনুসৰি অসম কম পৰিমাণে ঋণ গ্ৰহণ কৰা দেশৰ ৫ খন ৰাজ্যৰ তালিকাত অন্তৰ্ভুক্ত হৈছে বুলিও মুখ্যমন্ত্ৰীয়ে উল্লেখ কৰে। তেওঁ লগতে এখন জনমুখী বাজেট উত্থাপন কৰাৰ বাবে বিত্তমন্ত্ৰীগৰাকীক আন্তৰিক অভিনন্দন জ্ঞাপন কৰে। বিৰোধী দলপতি দেৱব্ৰত শইকীয়াই এইবাৰৰ বাজেটখন আশানুৰূপ হোৱা নাই বুলি মত প্ৰকাশ কৰে । তেওঁ বাজেটখন জনমুখী নে নির্বাচনমুখী বুলিও প্রশ্ন উত্থাপন কৰে। চৰকাৰে হিতাধিকাৰীৰ সৃষ্টিত গুৰুত্ব দিয়াক লৈ অসন্তুষ্টি প্ৰকাশ কৰি শ্ৰীশইকীয়াই পূৰ্বৰ বাজেটৰ বহু প্ৰতিশ্ৰুতি এতিয়াও পূৰণ হোৱা নাই বুলি অভিযোগ তোলে।
ৰাইজৰ দলৰ বিধায়ক অখিল গগৈয়ে এই বাজেটখনক নির্বাচনমুখী বাজেট বুলি অভিহিত কৰি মুখ্যমন্ত্ৰী ড° হিমন্ত বিশ্ব শৰ্মাৰ কাৰ্যকালত মুঠ ঘৰুৱা উৎপাদনৰ হাৰ হ্ৰাস পোৱা বুলি অভিযোগ কৰে ।
উল্লেখযোগ্য যে, অসম বিধানসভাত বিত্তমন্ত্রী অজন্তা নেওগে কালি ২০২৫-২৬ বিত্তীয় বৰ্ষৰ বাবে এক লাখ ৫৫ হাজাৰ ৪২৮ কোটি ৭৫ লাখ টকাৰ সাধাৰণ বাজেট উত্থাপন কৰে। ৬২০ কোটি ২৭ লাখ টকাৰ ঘাটি বাজেটখনত কেইবাটাও গুৰুত্বপূৰ্ণ প্ৰস্তাৱ দিয়া হৈছে। একেদৰে ২০২৪-২৫ বৰ্ষৰ ৬ মার্চ পর্যন্ত প্রকৃত ব্যয়ৰ ওপৰত কৰা পূৰ্বানুমান অনুসৰি বাজেটৰ মুঠ ব্যয় ১ লাখ ৪১ হাজাৰ ৫২৯ কোটি টকা ধাৰ্য কৰা হৈছে।
আমাৰ আগৰ বাতৰিতে কোৱা হৈছে যে, এইবাৰৰ বাজেটত ৰাজ্য চৰকাৰৰ ধবজাবাহী আঁচনি অৰুণোদয়ৰ তৃতীয় পৰ্যায়ৰ বাবে প্ৰায় ৫ হাজাৰ কোটি টকা ধাৰ্য কৰা হৈছে। অৰুণোদয় আঁচনিৰ হিতাধিকাৰীৰ সংখ্যা ১৮ লাখৰ পৰা পৰৱৰ্তী বিত্তীয় বছৰৰ শেষলৈ ৩৭ দশমিক ২ লাখলৈ বৃদ্ধি কৰা হ‘ব বুলি বিত্তমন্ত্ৰীগৰাকীয়ে ঘোষণা কৰে। বিধৱা পেঞ্চনৰ হিতাধিকাৰীৰ সংখ্যাও পূৰ্বৰ ২৮ লাখৰ পৰা ৩৭ লাখ ২০ হাজাৰলৈ বৃদ্ধি কৰা হ‘ব। এই আঁচনিৰ অধীনত প্ৰদান কৰি অহা ধন মাহে এহেজাৰ ২৫০ টকালৈ বৃদ্ধি কৰা হ‘ব বুলিও বিত্তমন্ত্ৰীগৰাকীয়ে ঘোষণা কৰে।
এইবাৰৰ বাজেটত ৰেচন কাৰ্ডৰ জৰিয়তে ৰাজ্যখনৰ প্ৰতিটো পৰিয়াললৈ মাহে ১ কিলোগ্ৰামকৈ ৰাজসাহায্যযুক্ত মচুৰ দাইল, চেনি আৰু নিমখ যোগান ধৰাৰ বাবে প্ৰস্তাৱ গ্ৰহণ কৰা হৈছে। মহিলা উদ্যমিতা অভিযানৰ জৰিয়তে প্ৰতিগৰাকী হিতাধিকাৰীলৈ ঋণৰ ব্যৱস্থা কৰা হৈছে বুলি উল্লেখ কৰি বিত্তমন্ত্ৰীগৰাকীয়ে কয় যে এই আঁচনিখন অহা ১ এপ্রিলত মুখ্যমন্ত্রী ড° হিমন্ত বিশ্ব শৰ্মাই বিহালী বিধানসভা সমষ্টিত আনুষ্ঠানিকভাৱে মুকলি কৰিব। নিযুত মইনা আঁচনিৰ জৰিয়তে উপকৃত হ‘বলগীয়া ছাত্ৰীৰ সংখ্যা ৪ লাখ ২০ হাজাৰলৈ বৃদ্ধি হ’ব বুলিও বিত্তমন্ত্ৰীগৰাকীয়ে বাজেট ভাষণত উল্লেখ কৰে।