বৰপেটা সত্ৰ পৰিচালনা সমিতিৰ নৱ-নৰ্বাচিত সদস্যসকলে আজি শপতগ্ৰহণ কৰে। বৰপেটা সত্ৰৰ বুঢ়া সত্ৰীয়া ড° বাবুল চন্দ্ৰ দাসে ডেকা সত্ৰীয়া গৌতম পাঠকৰ উপস্থিতিত সত্ৰ পৰিচালনা সমিতিৰ নিৰ্বাচিত ২৮ গৰাকী সদস্যক সত্ৰখনৰ মঠৰ চোতালত শপতবাক্য পাঠ কৰোৱায়। উল্লেখযোগ্য যে যোৱা ২৯ ছেপ্তেম্বৰত অনুষ্ঠিত হোৱা নিৰ্বাচনত বৰপেটা সত্ৰৰ ২২ খন হাটীৰ পৰা ২৮ গৰাকী সদস্য নিৰ্বাচিত হৈছিল। বৰপেটা সত্ৰৰ বুঢ়া সত্ৰীয়াক সভাপতি হিচাপে লৈ গঠন হোৱা সত্ৰ পৰিচালনা সমিতিৰ সম্পাদকক নিৰ্বাচিত কৰাৰ বাবে পৰম্পৰাগতভাৱে সত্ৰৰ পাট চাঙত নৱনিৰ্বাচিত সদস্যসকলৰ সভা অনুষ্ঠিত হয়। এই সভাতে অহা তিনি বছৰৰ বাবে অশোক কুমাৰ দাসক সমিতিৰ সম্পাদক ৰূপে নিৰ্বাচন কৰা হৈছে বুলি বুঢ়া সত্ৰীয়া ড° দাসে জানিবলৈ দিয়ে।