দেশৰ সাতখন ৰাজ্যৰ ১৩ খন বিধানসভা আসনৰ বাবে বুধবাৰে হোৱা উপ-নির্বাচনত কংগ্ৰেছ আৰু তৃণমূল কংগ্ৰেছে চাৰিখনকৈ আসন লাভ কৰিছে। বিজেপি দুখন আৰু আম আদমী পাৰ্টী আৰু ডি এম কে একোখনকৈ আসনত জয় হৈছে। ইফালে বিহাৰৰ ৰুপৌলী বিধানসভা সমষ্টিত নির্দলীয় প্রার্থী শংকৰ সিঙে তেওঁৰ নিকটতম প্রতিদ্বন্দ্বী জে ডি ইউৰ কলাধৰ প্ৰসাদ মণ্ডলক ৮ হাজাৰ ২৬৪ ভোটৰ ব্যৱধানত পৰাস্ত কৰিছে। আম আদমী পাৰ্টীয়ে পাঞ্জাবৰ জলন্ধৰ পশ্চিম সংৰক্ষিত আসন হস্তগত কৰিছে। হিমাচল প্ৰদেশত শাসকীয় কংগ্ৰেছে দেহেৰা আৰু নালাগড় বিভানসভা সমষ্টিত জয় হোৱাৰ বিপৰীতে বিজেপিয়ে হমিৰপুৰ আসন দখল কৰিছে। পশ্চিমবংগত শাসকীয় তৃণমূল কংগ্ৰেছে ৰায়গঞ্জ, ৰানাঘাট দক্ষিণ, মাণিকতলা আৰু বাগদা আসন লাভ কৰিবলৈ সমৰ্থ হৈছে। উত্তৰাখণ্ডৰ বদ্রীনাথ আৰু মংগল’ৰ বিধানসভা সমষ্টি কংগ্ৰেছৰ দখললৈ গৈছে। মধ্যপ্ৰদেশত বিজেপি প্রার্থী কমলেশ প্রতাপ শ্বাহে অমৰৱাৰা আসনত জয়লাভ কৰিছে।