অসম বিধানসভাৰ শৰৎকালীন অধিবেশনৰ আজি প্ৰথম দিনা ৰাইজৰ দলৰ বিধায়ক অখিল গগৈ, এ আই ইউ ডি এফৰ বিধায়ক আমিনুল ইছলাম (জ্যেষ্ঠ) আৰু কংগ্ৰেছৰ দেৱব্ৰত শ‍ইকীয়াই সভা স্থগিত প্ৰস্তাৱ উত্থাপন কৰে। অখিল গগৈয়ে শিৱসাগৰত এগৰাকী যুৱতীক অপদস্থ কৰা, আমিনুল ইছলামে ভূমি ক্রয়- বিক্ৰয়ৰ ক্ষেত্ৰত মুখ্যমন্ত্ৰীয়ে কৰা বক্তব্য আৰু দেৱব্ৰত শ‍ইকীয়াই স্মার্ট বৈদ্যুতিক মিটাৰ সন্দৰ্ভত সভাস্থগিত প্ৰস্তাৱ তোলে যদিও অধ্যক্ষ বিশ্বজিৎ দৈমাৰীয়ে এই তিনিওটা প্রস্তাৱ নাকচ কৰে। ইয়াকে লৈ কংগ্ৰেছ আৰু এ আই ইউ ডি এফৰ বিধায়কসকলে প্লেকার্ড লৈ অধ্যক্ষৰ সন্মুখত ধর্ণা দি বিধানসভা ত্যাগ কৰে। চৰকাৰৰ স্থিতিত ক্ষুণ্ণ হৈ আৰু অধ্যক্ষৰ বিৰুদ্ধে পক্ষপাতিত্বৰ অভিযোগ তুলি বিধায়ক অখিল গগৈৰ লগতে কংগ্ৰেছ আৰু এ আই ইউ ডি এফৰ বিধায়কসকলে সুকীয়া সুকীয়াকৈ সদন ত্যাগ কৰে।