অসম চৰকাৰে অহা ১৯ চেপ্তেম্বৰত অৰুণোদয় তৃতীয় পৰ্যায়ৰ আঁচনিৰ অধীনত ৰাজ্যৰ ১২৬ টা বিধানসভা সমষ্টিৰ ১২ লাখ ৬০ হাজাৰ নতুন হিতাধিকাৰীক সামৰি ল‘ব। তদুপৰি একেদিনাই ১৭ লাখ হিতাধিকাৰীলৈ নতুন ৰেচন কাৰ্ড প্ৰদান প্ৰক্ৰিয়া আৰম্ভ হ‘ব। মুখ্যমন্ত্রী হিমন্ত বিশ্ব শৰ্মাই আজি তৃতীয় পৰ্যায়ৰ অৰুণোদয় আৰু ৰাষ্ট্ৰীয় খাদ্য সুৰক্ষা আইন সম্পৰ্কীয় এখন বৈঠকত অংশ লোৱাৰ পাছত এই বিষয়ে প্রকাশ কৰে। মুখ্যমন্ত্ৰীয়ে ভার্চুৱেল মাধ্যমেৰে সাংসদ বিধায়ক আৰু জিলাসমূহৰ আয়ুক্তসকলক এই দুয়োটা পদক্ষেপ কাৰ্যকৰী কৰাৰ দিশত সহায়-সহযোগিতা আগবঢ়াবলৈ আহ্বান জনায়। তেওঁ লগতে হিতাধিকাৰীসকলৰ মাজত সজাগতা বৃদ্ধিত গুৰুত্ব আৰোপ কৰি জিলা আয়ুক্তসকলক প্ৰতিটো বিধানসভা এলেকাত একোখনকৈ সভা অনুষ্ঠিত কৰিবলৈ নিৰ্দেশ দিয়ে। মুখ্যমন্ত্রীয়ে কয় যে এই দিনটো ৰাজ্যখনৰ উন্নয়নৰ দিশত দুটা ধ্বজাবাহী পদক্ষেপৰ সূচনাৰে গুৰুত্বপূৰ্ণ হিচাপে বিবেচিত হ‘ব।