আফ্রিকা মহাদেশৰ অন্তৰ্গত মুজাম্বিকৰ ৰাজধানী মাপুট’ত উচ্চ সুৰক্ষা সম্পন্ন এখন জে’লৰ পৰা বৰদিনৰ দিনা কমেও ৬ হাজাৰ কয়দীয়ে পলাবলৈ কৰা চেষ্টাত ৩৩ জন কয়দীৰ মৃত্যু হোৱাৰ লগতে আন ১৫ জন গুৰুতৰভাৱে আহত হয়। দেশখনত শেহতীয়াকৈ নিৰ্বাচনী ফলাফলৰ পৰিপ্ৰেক্ষিতত সৃষ্টি হোৱা ৰাজনৈতিক অস্থিৰতাৰ মাজতে এই ঘটনা সংঘটিত হয়। জে’লৰ পৰা পলাবলৈ চেষ্টা কৰা কয়দীসকলৰ নিৰাপত্তা বাহিনীৰ সৈতে হোৱা হতাহতিৰ ফলতে ৩৩ জনকৈ কয়দীৰ মৃত্যু হয় বুলি দেশখনৰ আৰক্ষীয়ে প্ৰকাশ কৰিছে। মুজাম্বিকৰ উচ্চ ন্যায়ালয়ে ১৯৭৫ চনৰ পৰা শাসনত থকা ফ্ৰেলিম’ দলে অক্টোবৰত হোৱা ৰাষ্ট্ৰপতিৰ নিৰ্বাচনত জয়লাভ কৰা বুলি ৰায় দিয়াৰ পাছতে দেশখনত ৰাজনৈতিক অস্থিৰতা বৃদ্ধি পায়।