ৰাজ্যৰ তৃতীয় পৰ্যায়ত হ’বলগীয়া ৪টা লোকসভা সমষ্টিৰ প্ৰাৰ্থীৰ মনোনয়ন দাখিল প্রক্রিয়াই ক্রমাৎ গতি লাভ কৰিছে। আজি বৰপেটা লোকসভা সমষ্টিৰ কংগ্ৰেছ প্রার্থী দ্বীপ বায়নে মনোনয়ন দাখিল কৰে । বৰপেটা বিদ্যাপীঠ খেলপথাৰৰ পৰা শোভাযাত্ৰা কৰি প্ৰদেশ কংগ্ৰেছৰ সভাপতি ভূপেন কুমাৰ বৰা, নিখিল ভাৰত কংগ্ৰেছ কমিটীৰ অসমৰ তত্বাৱধায়ক জীতেন্দ্ৰ সিং, নগাঁও লোকসভা সমষ্টিৰ কংগ্ৰেছ প্ৰাৰ্থী প্ৰদ্যুৎ বৰদলৈৰ লগতে কেইবাগৰাকীও জ্যেষ্ঠ নেতাৰ উপস্থিতিত শ্রীবায়নে মনোনয়ন দাখিল কৰে। ধুবুৰী লোকসভা সমষ্টিত আজি এ আই ইউ ডি এফ দলৰ মুৰববী তথা সাংসদ বদৰুদ্দিন আজমলে চতুৰ্থবাৰৰ বাবে মনোনয়ন পত্ৰ দাখিল কৰে। ধুবুৰীৰ ঝগৰাৰপাৰ ষ্টেডিয়ামৰ পৰা শোভাযাত্ৰা কৰি বিধায়ক নুৰুল হক, নিজানুৰ ৰহমান, বিধায়ক তথা নগাওঁ লোকসভা সমষ্টিৰ দলীয় প্রার্থী আমিনুল ইছলাম, বিধায়ক হাফিজ বছিৰ আহমেদ কাছিমীৰ লগতে ভালেসংখ্যক নেতা-কৰ্মীৰ উপস্থিত ধুবুৰী আয়ুক্ত কাৰ্যালয়ত মনোনয়ন দাখিল কৰে। উল্লেখযোগ্য অহা ১৯ এপ্ৰিলত তৃতীয় পৰ্যায়ৰ মনোনয়ন দাখিলৰ অন্তিম দিন। আনহাতে মনোনয়ন প্রত্যাহাৰৰ দিন অহা ২২ এপ্ৰিল। তৃতীয় পৰ্যায়ৰ ভোটগ্রহণ ৭ মে’ত অনুষ্ঠিত হ’ব।