ৰাজ্যৰ বিভিন্ন বিশ্ববিদ্যালয়ৰ অধীনৰ স্নাতক আৰু স্নাতকোত্তৰ নামভৰ্তি অহা ২৭ মে’ত সমর্থ প’ৰ্টেলৰ জৰিয়তে আৰম্ভ হ’ব। এই সন্দৰ্ভত ৰাজ্যৰ উচ্চ শিক্ষা বিভাগে অধিসূচনা জাৰি কৰিছে। ইয়াৰ অধীনত ৪ বছৰীয়া স্নাতক পাঠ্যক্ৰম, ৫ বছৰীয়া সংহত স্নাতকোত্তৰ পাঠ্যক্ৰমৰ নামভৰ্তিৰ বাবে ছাত্ৰ-ছাত্ৰীসকলে আবেদন কৰিব পাৰিব। চি ইউ ই টি পৰীক্ষাত অৱতীৰ্ণ নোহোৱা ছাত্ৰ-ছাত্ৰীয়েও এই প’ৰ্টেলৰ জৰিয়তে সকলো চৰকাৰী অথবা প্রাদেশীকৃত, স্বায়ত্বশাসিত মহাবিদ্যালয়ত নামভৰ্তিৰ বাবে আবেদন কৰিব পাৰিব। ইয়াৰ উপৰি ৰাজ্যিক বিশ্ববিদ্যালয় আৰু অসম বিশ্ববিদ্যালয়ৰ অনুমোদনপ্রাপ্ত মহাবিদ্যালয়তো নামভৰ্তিৰ বাবে ছাত্রী-ছাত্ৰীসকলে আবেদন কৰিব পাৰিব। নামভৰ্তি প’ৰ্টেলটোত মেধাভিত্তিত বাছনিৰ তালিকা প্ৰকাশ কৰা হ’ব। চি ইউ ই টি পৰীক্ষাত অৱতীৰ্ণ নোহোৱা ছাত্ৰ-ছাত্ৰীৰ বাছনিৰ তালিকা ১০ জুনৰ পৰা ১৬ জুনৰ ভিতৰত প্ৰকাশ কৰা হ’ব। এই তালিকাত বাছনিভুক্ত ছাত্ৰ-ছাত্ৰীৰ নামভৰ্তি ১১ জুনৰ পৰা ১৯ জুনৰ ভিতৰত সম্পন্ন হ’ব। একেদৰে চি ইউ ই টি পৰীক্ষাত অৱতীৰ্ণ হোৱা ছাত্ৰ-ছাত্ৰীৰ বাছনিৰ তালিকা ৯ জুলাইৰ পৰা ১৬ জুলাইৰ ভিতৰত প্ৰকাশ পাব। এই তালিকাত বাছনিভুক্ত শিক্ষাৰ্থীৰ নামভৰ্তিৰ ১০ জুলাইৰ পৰা ১৮ জুলাইৰ ভিতৰত সম্পন্ন হ’ব। ছাত্ৰ-ছাত্ৰীসকলে ASSAMADMISSION.SAMARTH.AC.IN প’ৰ্টেলৰ জৰিয়তে আবেদন কৰিব পাৰিব।