ডাউনলোড
মোবাইল এপ

android apple
signal

ৰাজ্যৰ বিভিন্ন প্ৰান্তত জিলা স্বাস্থ্য সমিতিৰ উদ্যোগত স্বাস্থ্য আৰু কল্যাণ শিবিৰ মুকলি

ৰাজ্যজুৰি স্বাস্থ্যসেৱা সুলভ আৰু ইয়াৰ আন্তঃগাঁথনি উন্নত কৰাৰ বাবে অসম মন্ত্রীসভাত গ্ৰহণ কৰা সিদ্ধান্ত অনুসৰি আজি ৰাজ্যৰ বিভিন্ন প্ৰান্তত জিলা স্বাস্থ্য সমিতিসমূহৰ উদ্যোগত স্বাস্থ্য আৰু কল্যাণ শিবিৰ অনুষ্ঠিত হয়। মুখ্যমন্ত্ৰী ড° হিমন্ত বিশ্ব শৰ্মাৰ উপস্থিতিত বিশ্বনাথত ওদালগুৰি জিলা স্বাস্থ্য সমিতিৰ উদ্যোগত আজি আম্বাগাঁও বড়ো উচ্চতৰ মাধ্যমিক বিদ্যালয়ত স্বাস্থ্য আৰু কল্যাণ শিবিৰ অনুষ্ঠিত হয়। জিলা আয়ুক্ত পুলক পাটগিৰিয়ে শিবিৰটো উদ্বোধন কৰে। জনসাধাৰণৰ স্বাস্থ্য পৰীক্ষা কৰাৰ উদ্দেশ্যে আয়োজিত এই স্বাস্থ্য মেলাত প্রসূতি, মেডিচিন, চকু, হাড়, শিশুরোগ, মানসিক স্বাস্থ্যকে ধৰি বিভিন্ন দিশত বিশেষজ্ঞ চিকিৎসকৰ দ্বাৰা পৰীক্ষা কৰোৱা হয়। ১৫ গৰাকী চিকিৎসকে এই শিবিৰত চিকিৎসা সেৱা আগবঢ়ায়।
স্বাস্থ্য সেৱাৰ আন্তঃগাঁথনি অধিক শক্তিশালী কৰা তথা জনসাধাৰণৰ বাবে গুণগত চিকিৎসা সুনিশ্চিত কৰাৰ লক্ষ্যৰে ৰাজ্যৰ অন্যান্য জিলাতো শিবিসমূহ মুকলি কৰা হয়। কৃষিমন্ত্ৰী অতুল বৰাই আজি বোকাখাত গাঁও পঞ্চায়তৰ বোকাখাত হাইস্কুলত আয়োজিত স্বাস্থ্য আৰু কল্যাণ শিবিব আনুষ্ঠানিকভাৱে মুকলি কৰে। মন্ত্ৰীগৰাকীয়ে এই শিবিৰ মুকলি কৰি গ্ৰামাঞ্চল, বিশেষকৈ আওহতীয়া অঞ্চলসমূহত স্বাস্থ্য সেৱা সুচল কৰি তোলাৰ ক্ষেত্ৰত এই পদক্ষেপে বিশেষ ভূমিকা পালন কৰিব বুলি মন্তব্য কবে। এই শিবিবসমূহে স্বাস্থ্য আৰু পৰিষ্কাৰ-পৰিচ্ছন্নতাৰ বিষয়ে জনসাধাৰণক সজাগ কৰিব বুলিও তেওঁ আশা প্রকাশ কৰে ।
চৰাইদেউ জিলাৰ স্বাস্থ্য আৰু পৰিয়াল কল্যাণ বিভাগৰ উদ্যোগত আজি জিলাখনৰ মাহমৰা দিপলিং উচ্চতৰ মাধ্যমিক বিদ্যালয়ত জিলা পৰ্যায়ৰ স্বাস্থ্য আৰু কল্যাণ শিবিৰ মুকলি কৰা হয়। ৰাজ্য চৰকাৰৰ পৰিবহণ, পার্বত্য অঞ্চল উন্নয়ন মন্ত্রী যোগেন মহনে আজি শিবিৰটো আনুষ্ঠানিকভাৱে মুকলি কৰে। জিলাখনৰ ৪০টা স্থানত পর্যায়ক্রমে এই শিবিৰ মুকলি কৰা হ’ব। শিবিৰসমূহত কেইবাগৰাকীও বিশেষজ্ঞ চিকিৎসকে সেৱা আগবঢ়াব। ধেমাজি জিলাতো আজি স্বাস্থ্য আৰু কল্যাণ শিবিৰৰ উদ্বোধন কৰা হয়। জিলা স্বাস্থ্য সমিতিৰ উদ্যোগত জিলাখনৰ ৬৫ খন গাঁও পঞ্চায়ত আৰু দুখন পৌৰসভাক সামৰি পৰ্যায়ক্রমে ১৭ জুলাই পর্যন্ত এই স্বাস্থ্যমেলা মুকলি থাকিব। ১৪ জন বিশেষজ্ঞ চিকিৎসকে সেৱা আগবঢ়াবলগীয়া শিবিৰত কেইবাটাও ৰোগৰ পৰীক্ষা আৰু পুষ্টি সম্পৰ্কীয় পৰামৰ্শ দিয়া হ’ব। জিলাখনৰ সমজিলা জোনাইতো আজি স্বাস্থ্যমেলা অনুষ্ঠিত হয়। নগাঁও জিলাৰ বুঢ়াগোহাঁই থান খণ্ড প্রাথমিক স্বাস্থ্যকেন্দ্ৰৰ অন্তৰ্গত ৰায়দঙীয়া ৰাজহুৱা মঞ্চত আজি বিধায়ক ৰূপক শৰ্মাই জিলা পৰ্যায়ৰ স্বাস্থ্য শিবিৰ মুকলি কৰে। এই শিবিৰত প্ৰায় ৩০০ জন লোকৰ স্বাস্থ্য পৰীক্ষা কৰোৱা হয়। গোলাঘাট স্বাস্থ্য বিভাগৰ উদ্যোগত গাঁও পঞ্চায়ত স্তৰত আজি স্বাস্থ্য আৰু কল্যাণ শিবিৰ অনুষ্ঠিত হয়। আজি জিলাখনত এহেজাৰ ১৬৭ জন লোকক স্বাস্থ্য পৰীক্ষা কৰি চিকিৎসা সেৱা প্ৰদান কৰা হয়।

অধিক পঢ়ক

সকলো চাওক