সংসদীয় পৰিক্ৰমা মন্ত্ৰী কিৰেন ৰিজিজুৱে কালি নতুন দিল্লীত ৰাজ্যসভাৰ বিৰোধী নেতা তথা কংগ্ৰেছৰ সভাপতি মল্লিকার্জুন খাৰ্গেক সাক্ষাৎ কৰে। সামাজিক মাধ্যমৰ এটা পোষ্টত শ্ৰীৰিজিজুৱে কয় যে, এই সাক্ষাতৰ সময়ত শ্ৰী খাৰ্গেই নিজৰ জীৱনৰ বহুতো বহুমূলীয়া অভিজ্ঞতাৰ বিষয়ে তেওঁৰ সৈতে আলোচনা কৰে। তেওঁ কয় যে, তেওঁলোক সকলোৱে মিলি ৰাষ্ট্ৰৰ উন্নতিৰ হকে কাম কৰিব। উল্লেখযোগ্য যে অহা ২৪ জুনৰ পৰা হ’বলগীয়া অষ্টাদশ লোকসভাৰ প্ৰথম অধিৱেশনৰ পূৰ্বেই শ্রীখাৰ্গেৰ সৈতে মন্ত্ৰীগৰাকীৰ এই সাক্ষাৎ গুৰুত্বপূৰ্ণ বিবেচিত হৈছে। এই অধিৱেশনত লোকসভাৰ নৱনিৰ্বাচিত সদস্যসকলে শপত লোৱাৰ লগতে লোকসভাৰ অধ্যক্ষৰ নিৰ্বাচন অনুষ্ঠিত হ’ব। এই অধিৱেশনত ৰাষ্ট্ৰপতি শ্ৰীমতী দ্রৌপদী মুৰ্মুৱে লোকসভা আৰু ৰাজ্যসভাৰ যুটীয়া সংসদক উদ্দেশ্যি ভাষণ দিব। অহা ২৭ জুনৰ পৰা ৰাজ্যসভাৰ অধিৱেশন অনুষ্ঠিত হ’ব। ৩ জুলাইত সংসদৰ অধিৱেশনৰ সামৰণি পৰিব।