দেশভক্ত তৰুণৰাম ফুকনৰ ৮৫ সংখ্যক মৃত্যু বার্ষিকী উপলক্ষে আজি ৰাজ্যজুৰি দেশভক্তি দিৱস পালন কৰা হয়। এই উপলক্ষে গুৱাহাটীৰ দেশভক্ত তৰুণৰাম ফুকন উদ্যানত ৰাজ্য চৰকাৰৰ উদ্যোগত আজি এক শ্রদ্ধাঞ্জলি অনুষ্ঠানৰ আয়োজন কৰা হয়। ইয়াৰ লগত সংগতি ৰাখি জনতা ভৱনৰ সভাকক্ষত আয়োজিত এখন মুকলি সভাত ৰাজ্য চৰকাৰৰ তথ্য আৰু জনসংযোগ বিভাগৰ মন্ত্ৰী পীয়ুষ হাজৰিকা মুখ্য অতিথি হিচাপে উপস্থিত থাকে। উল্লেখযোগ্য যে ২০২১ চনৰ পৰা কেবিনেট বৈঠকৰ সিদ্ধান্ত অনুসৰি আজিৰ দিনটোত সমগ্ৰ ৰাজ্যতে দেশভক্তি দিৱস হিচাপে পালন কৰি অহা হৈছে। তামুলপুৰৰ আয়ুক্ত কাৰ্যালয় সভাকক্ষত আজি দেশভক্তি দিৱস উদযাপন কৰা হয়। কাৰ্যসূচীৰ আৰম্ভণিতে দেশভক্ত তৰুণৰাম ফুকনৰ প্ৰতিচ্ছবিত বন্তি প্ৰজ্বলন আৰু মাল্যাৰ্পণ কৰা হয়। ইয়াৰ পাছতে জিলাখনৰ স্বাধীনতা সংগ্ৰামীসকলৰ পৰিয়ালৰ সদস্যবৃন্দক সম্বৰ্দ্ধনা জনোৱা হয় ৷ দৰং জিলা প্ৰশাসনৰ উদ্যোগতো আজি জিলা তথ্য আৰু জনসংযোগ বিষয়াৰ কাৰ্যালয়ৰ সহযোগত দেশভক্ত তৰুণৰাম ফুকনৰ মৃত্যু তিথি উপলক্ষে দেশভক্তি দিৱস পালন কৰা হয়। যোৰহাট জিলা প্ৰশাসনৰ উদ্যোগত আৰু জিলা তথ্য আৰু জনসংযোগ বিষয়াৰ কাৰ্যালয়ৰ সহযোগত আৱৰ্ত্ত ভৱনৰ সভাকক্ষত দেশভক্ত তৰুণৰাম ফুকনৰ প্ৰতিচ্ছবিত বন্তি প্ৰজ্বলন কৰি শ্ৰদ্ধা নিবেদন কৰা হয়। জিলাখনৰ আৰক্ষী প্ৰশাসনেও দেশভক্তি দিৱস পালন কৰি নেতাগৰাকীক শ্রদ্ধাঞ্জলি জ্ঞাপন কৰে। গোৱালপাৰা জিলা প্ৰশাসনৰ উদ্যোগত জিলা আয়ুক্তৰ কাৰ্যালয় সভাকক্ষত দেশভক্তি দিৱস পালন কৰা হয়। এই উপলক্ষে দেশভক্ত তৰুণৰাম ফুকনৰ প্ৰতিচ্ছবিত প্রজ্বলন কৰাৰ লগতে এখন স্মৃতিচাৰণ সভাও অনুষ্ঠিত কৰা হয় ৷ কাৰ্বি আংলং জিলা প্ৰশাসনৰ উদ্যোগতো আজি ডিফু ফাৰ্মাৰ গ্রোথ চেণ্টাৰত অনুষ্ঠিত দেশভক্তি দিৱসৰ কাৰ্যসূচীত তৰুণৰাম ফুকনৰ জীৱন আৰু কৰ্মৰাজি সন্দৰ্ভত আলোকপাত কৰা হয়। চিৰাং জিলাৰ তথ্য আৰু জনসংযোগ বিভাগৰ উদ্যোগত তথা জিলা প্ৰশাসনৰ সহযোগত আয়ুক্তৰ কাৰ্যালয় সভাকক্ষত দেশভক্তি দিৱস পালন কৰা হয়। তিনিচুকীয়া জিলাৰ জিলা আয়ুক্তৰ কাৰ্যালয়ৰ সভাকক্ষত অনুষ্ঠিত দেশভক্তি দিৱসত মুখ্য অতিথি হিচাপে উপস্থিত থাকি মন্ত্রী সঞ্জয় কিষাণে নতুন প্ৰজন্মক তৰুণৰাম ফুকনৰ জীৱনৰ কাহিনীৰে উদ্বুদ্ধ হৈ দেশৰ হকে আত্মনিয়োগ কৰিবলৈ আহ্বান জনায়। শোণিতপুৰ জিলা প্ৰশাসনৰ উদ্যোগত তথা জিলা তথ্য আৰু জনসংযোগ বিভাগৰ সহযোগত আজি দেশভক্তি দিৱস উপলক্ষে জিলা আয়ুক্তৰ কাৰ্যালয় প্ৰাঙ্গনত শ্রদ্ধাঞ্জলি তৰ্পণ কাৰ্যসূচী উদযাপন কৰা হয়। কোকৰাঝাৰ জিলাৰ বিজ্ঞান মহাবিদ্যালয় প্রেক্ষাগৃহতো আজি জিলা প্ৰশাসনৰ উদ্যোগত দেশভক্ত তৰুণৰাম ফুকনৰ মৃত্যুতিথিৰ দিনটো দেশভক্তি দিৱস হিচাপে পালন কৰা হয়। মৰিগাঁও জিলা আয়ুক্তৰ কাৰ্যালয়তো ছাত্ৰ-ছাত্ৰী আৰু আয়ুক্তৰ কাৰ্যালয়ৰ কৰ্মচাৰীসকলৰ উপস্থিতিত দেশভক্তি দিৱস পালন কৰা হয়। সভাত এই উপলক্ষে আয়োজিত ৰচনা প্ৰতিযোগিতাত বিজয়ীসকলক বঁটা বিতৰণ কৰা হয় ৷ বৰপেটা জিলা প্ৰশাসনৰ উদ্যোগতো আজি বৰপেটা মহাবিদ্যালয়ত দেশভক্তি দিৱস পালন কৰা হয় ৷ চৰাইদেউ জিলাত অনুষ্ঠিত দেশভক্তি দিৱসৰ কাৰ্যসূচীত অংশগ্ৰহণ কৰি মন্ত্ৰী যোগেন মহনে অংশগ্ৰহণ কৰি স্বাধীনতা সংগ্রামী দেশভক্ত তৰুণৰাম ফুকনৰ অৱদানৰ বিষয়ে শ্ৰদ্ধাৰে সোঁৱৰণ কৰে।