প্রধানমন্ত্ৰী নৰেন্দ্ৰ মোদীয়ে ২০২৫-২৬ বৰ্ষৰ কেন্দ্ৰীয় বাজেটক দেশৰ প্ৰগতিৰ পৰিৱৰ্তনকামী পদক্ষেপ বুলি অভিহিত কৰিছে। এই বাজেটে বিকশিত ভাৰতৰ লক্ষ্যৰ প্ৰতি দেশৰ যাত্ৰাক ত্বৰান্বিত কৰিব বুলিও তেওঁ উল্লেখ কৰে। এই বাজেটে কৃত্রিম বুদ্ধিমত্তা, পুতলা নির্মাণ, কৃষি, জোতা-চেণ্ডেল, খাদ্য প্রসংস্কৰণকে ধৰি বিভিন্ন ক্ষেত্ৰত বহনক্ষম উন্নয়ন তথা উদ্ভাৱন আৰু উদ্যমিতাৰ পথ প্ৰশস্ত কৰা বুলি প্ৰধানমন্ত্ৰীয়ে প্ৰকাশ কৰে। তেওঁ কয় যে, এই বাজেটত ১৪০ কোটি জনতাৰ আশা-আকাংক্ষাক বাস্তৱায়িত কৰাৰ বাবে থকা চৰকাৰৰ প্ৰতিশ্ৰুতিবদ্ধতাৰ প্ৰতিফলন ঘটিছে। বাজেট সম্পর্কত দিয়া এটা পোষ্টত প্ৰধানমন্ত্ৰীয়ে দেশৰ বিকাশৰ যাত্ৰাৰ বাবে এইবাৰৰ বাজেটক এটা গুৰুত্বপূৰ্ণ মাইলৰ খুঁটি বুলিও অভিহিত কৰিছে। তেওঁ কয়, যে এই বাজেট প্ৰতিগৰাকী ভাৰতীয়ৰ সপোন পূৰণ কৰিছে। তেওঁ লগতে এই বাটেজে সঞ্চয়, বিনিয়োগ, সামগ্ৰীৰ ব্যৱহাৰ বৃদ্ধি কৰাৰ লগতে দেশৰ বিকাশতো গুৰুত্বপূৰ্ণ ভূমিকা পালন কৰিব বুলি উল্লেখ কৰে। এই বাজেটে বছৰি ১২ লাখ টকাকৈ উপাৰ্জন কৰা ব্যক্তিৰ ক্ষেত্ৰত আয়কৰ দিব নালাগে বুলি ঘোষণা কৰিছে। এই ঘোষণাই দেশৰ মধ্যবিত্ত শ্রেণীক উপকৃত কৰিব বুলি তেওঁ উল্লেখ কৰে। এই বাজেটে কৃষি খণ্ডৰ সৱলীকৰণেৰে গ্ৰাম্য অৰ্থনীতিৰ উন্নয়নত সহায় কৰিব বুলিও তেওঁ কয়। দেশৰ উদ্যমীসকলৰ লগতে, অতি ক্ষুদ্র ক্ষুদ্ৰ আৰু মজলীয়া উদ্যোগক সৱল কৰাৰ ক্ষেত্ৰত এই বাজেটে গুৰুত্ব দিছে বুলিও প্রধানমন্ত্রীয়ে কয়। প্ৰতিৰক্ষা মন্ত্ৰী ৰাজনাথ সিঙে এই বাজেটত সমাজৰ সকলো শ্ৰেণীৰ লোকৰ সৱলীকৰণৰ উদ্দেশ্যে এটা সর্বাত্মক দৃষ্টিভংগী প্রতিফলিত হৈছে। প্ৰতিৰক্ষা খণ্ডত দেশক আত্মনিৰ্ভৰশীল কৰাৰ বাবে প্রধানমন্ত্ৰী নৰেন্দ্ৰ মোদীৰ সপোন বাস্তবায়িত কৰাৰ দিশত কেন্দ্ৰীয় বাজেটে গুৰুত্ব আৰোপ কৰা বুলি প্ৰতিৰক্ষা মন্ত্ৰীগৰাকীয়ে উল্লেখ কৰে। ২০২৫-২৬ বৰ্ষৰ কেন্দ্ৰীয় বাজেটত প্ৰতিৰক্ষা মন্ত্ৰ্যালয়লৈ ৬ লাখ ৮১ হাজাৰ কোটি টকা আৱণ্টন কৰা বুলি তেওঁ প্ৰকাশ কৰে।