লোকসভা আৰু বিধানসভাৰ প্ৰস্তাৱিত সমষ্টি পুনৰনিৰ্ধাৰণ বিষয়ক লৈ ডি এম কেকে ধৰি বিৰোধী পক্ষৰ সাংসদসকলে সৃষ্টি কৰা হুলস্থূলীয়া পৰিস্থিতিৰ বাবে আজি সংসদৰ উভয় সদনৰ কাৰ্যক্ৰমণিকা দিনৰ ২ বজালৈ স্থগিত ৰখা হয়। লোকসভাত দিনৰ ১২ বজাত সদন পুনৰ মিলিত হোৱাৰ সময়ত ডি এম কেৰ সাংসদসকলক প্ৰস্তাৱিত সমষ্টি পুনৰনিৰ্ধাৰণৰ প্ৰতিবাদৰ সময়ত টি চাৰ্ট পৰিধান কৰি অহা পৰিলক্ষিত হয়। সদনৰ সভাপতিয়ে প্ৰতিবাদৰত সদস্যসকলে এনে পোছাক পৰিধান কৰাৰ বিৰোধিতা কৰে। ডি এম কে আৰু কংগ্ৰেছৰ একাংশ সাংসদে পুনৰ হুলস্থূলীয়া পৰিস্থিতিৰ সৃষ্টি কৰাত সদনৰ কাৰ্যকাল দিনৰ ২ বজালৈ সভাপতিয়ে স্থগিত ঘোষণা কৰে। ইয়াৰ পূৰ্বে পুৱাৰ ভাগত সদন মিলিত হোৱাৰ সময়ত ডি এম কেৰ প্ৰতিবাদৰত সদস্যসকলে টি-চার্ট পৰিধান কৰাৰ বিৰুদ্ধে কাৰ্যব্যৱস্থা গ্ৰহণ কৰি অধ্যক্ষ ওম বিৰলাই বিৰোধিতা কৰি সদনৰ কাৰ্যকাল দুপৰীয়া ১২ বজালৈ স্থগিত ৰাখে। শ্রীবিৰলাই কয় যে সদনৰ কাৰ্যক্ৰমণিকা ইয়াৰ নিয়ম অনুসৰি পৰিচালিত হ’ব। একাংশ সদস্যই সদনৰ মৰ্যাদা লাঘৱ কৰিছে বুলি উল্লেখ কৰি অধ্যক্ষগৰাকীয়ে কয় যে তেওঁ সদনত এনে নিয়মবিৰোধী কাৰ্যক সমৰ্থন নকৰে। ইয়াৰ পাছত তেওঁ টি-চার্ট পৰিহিত সাংসদসকলক সদন পৰিত্যাগ কৰিবলৈ আহ্বান জনায় যদিও ডি এম কে আৰু আন বিৰোধী দলৰ সদস্যসকলে হুলস্থূলীয়া পৰিবেশৰ সৃষ্টি কৰে।ৰাজ্যসভাতো আজি একেটা বিষয় লৈ সদন তিনিবাৰ স্থগিত ৰাখিবলগীয়া হয়।