ভাৰতৰ মহিলা মল্লযোদ্ধা দলে স্পেইনৰ প’ণ্টেৱেড্ৰাত অনুষ্ঠিত ২০ বছৰৰ অনুৰ্ধৰ বিশ্ব মল্লযুদ্ধ প্রতিযোগিতাত এটা সোণ, এটা ৰূপ আৰু তিনিটা ব্ৰঞ্জৰ পদকেৰে সামগ্রিকভাৱে দ্বিতীয় স্থান লাভ কৰিছে। নিটিকাই কালি মহিলাৰ ৬২ কিলোগ্রাম ওজন শাখাৰ ফ্ৰী ষ্টাইল শিতানত ৰূপৰ পদক অৰ্জন কৰে। নিটিকাই ফাইনেলত ইউক্রেইনৰ মল্লযোদ্ধা ইৰিনা বোন্দাৰাৰ হাতত ১-৪ ফলাফলত পৰাজিত হয়। একেদৰে, নেহাই হাংগেৰীৰ প্ৰতিদ্বন্দ্বীক ১০-৮ ফলাফলত পৰাভূত কৰি ৫৭ কিলোগ্রাম ওজন শাখাত ব্ৰঞ্জৰ পদক হস্তগত কৰে। ইয়াৰ পূৰ্বে জ্যোতি বেৰৱালে মহিলাৰ ৭৬ কিলোগ্রাম ওজন শাখাত দেশৰ হকে সোণৰ পদক অৰ্জন কৰিছিল। আনহাতে, কোমল আৰু সৃষ্টিয়ে ক্ৰমে ৫৯ আৰু ৬৮ কিলোগ্রাম শাখাত ব্ৰঞ্জৰ পদক লাভ কৰিছিল। ভাৰতে ফ্রিষ্টাইল শিতানতে আটাইকেইটা পদক লাভ কৰিছে। এই শিতানৰ খেলসমূহৰ কালি সামৰণি পৰে। পুৰুষৰ ফ্রি ষ্টাইল শিতানৰ খেলসমূহ আজি অনুষ্ঠিত হ’ব। ভাৰতৰ দুগৰাকী মল্ল যোদ্ধা ব্রঞ্জ পদকৰ যুঁজত অৱতীৰ্ণ হ’ব।