নির্বাচন আয়োগে কালি বিয়লি ৰাজঘাটত থকা মহাত্মা গান্ধীৰ সমাধিত শ্ৰদ্ধাৰ্ঘ্য নিবেদন কৰে আৰু সদ্য সমাপ্ত হিংসামুক্ত নির্বাচন জাতিৰ পিতাগৰাকীৰ নাম উৎসৰ্গা কৰে। নিৰ্বাচন আয়োগে এটা বিবৃতি যোগে কৈছে মহাত্মা গান্ধীৰ অহিংসাৰ বাণীয়ে শান্তিপূৰ্ণ আৰু হিংসামুক্ত নিৰ্বাচনৰ প্ৰতি আয়োগক প্রতিশ্রুতিবদ্ধ হ’বলৈ অনুপ্ৰাণিত কৰিছে। জম্মু-কাশ্মীৰ আৰু মণিপুৰে নিজৰ পৰিপক্ক আচৰণেৰে নিদৰ্শন দাঙি ধৰিছে আৰু এয়া ভৱিষ্যতৰ বাবে সঁচাকৈ শুভ সংকেত বুলি আয়োগৰ বিবৃতিত প্ৰকাশ কৰা হৈছে। বিবৃতিটোত বুলেট নহয় বেলটহে শান্তি আৰু উন্নয়নৰ পথ বুলি উল্লেখ কৰা হৈছে। নিৰ্বাচন আয়োগে লগতে উৰা বাতৰি আৰু ভিত্তিহীন সন্দেহেৰে নিৰ্বাচনী প্ৰক্ৰিয়া বিনষ্ট কৰাৰ সকলো প্ৰয়াস অগ্ৰাহ্য কৰিছে।