মুখ্যমন্ত্রী ড° হিমন্ত বিশ্ব শৰ্মাই আজি শিলচৰৰ এছ এন দেৱ অসামৰিক চিকিৎসালয়ত নতুন ক্রিটিকেল কেয়াৰ ভৱনৰ আধাৰশিলা স্থাপন কৰে। চিকিৎসালয়খনৰ ৬,৩৩৫ বর্গমিটাৰ এলেকা সামৰি ২৪ কোটি টকা ব্যয়সাপেক্ষে এই ৫০খন বিছনাযুক্ত ক্রিটিকেল কেয়াৰ ভৱনটো নিৰ্মাণ কৰা হ’ব। এই ভৱনত অস্ত্ৰোপচাৰ কক্ষ, ডায়েলেছিছ কক্ষ, শিশু চিকিৎসা কক্ষকে ধৰি উন্নত মানৰ সকলো সা-সুবিধা থাকিব। মুখ্যমন্ত্রীয়ে এই ভৱনৰ আধাৰশিলা স্থাপন কৰি শিলচৰত ২০০খন বিছনাযুক্ত নতুন চিকিৎসালয় ভৱন নিৰ্মাণৰ পৰিকল্পনাৰ কথা জানিবলৈ দিয়ে। মুখ্যমন্ত্ৰীগৰাকীয়ে লগতে শিলচৰৰ সংহত জিলা আয়ুক্ত কার্যালয়ত ২৬ কোটি টকা ব্যয়সাপেক্ষে ৩২টা কোঠাৰে নতুন আৱৰ্ত্ত ভৱনৰ আধাৰশিলাও স্থাপন কৰে। ড° শৰ্মাই যান-জঁটৰ সমস্যা লাঘৱ কৰিবলৈ শিলচৰত এখন উৰণ সেঁতু নিৰ্মাণ কৰা হ’ব বুলি প্ৰকাশ কৰে।
মুখ্যমন্ত্ৰীগৰাকীয়ে ইয়াৰ পূৰ্বে শিলচৰৰ দেশভক্ত তৰুণৰাম ফুকন উচ্চতৰ মাধ্যমিক বিদ্যালয়ৰ সোণালী জয়ন্তীৰ অনুষ্ঠানত অংশগ্ৰহণ কৰে। তেওঁ বিদ্যালয়খনৰ বৰ্তমান আৰু পূৰ্বৰ শিক্ষক-শিক্ষয়িত্রী, ছাত্র-ছাত্রীকে ধৰি অঞ্চলটোৰ বিদ্যানুৰাগী লোকসকলক অভিনন্দন জনোৱাৰ লগতে দেশভক্ত তৰুণৰাম ফুকনৰ প্ৰতি শ্ৰদ্ধা জ্ঞাপন কৰে। ড০ শৰ্মাই তেওঁৰ ভাষণত কয় যে সাম্প্ৰতিক অর্থনীতিত দক্ষ যুৱ শক্তিৰ গুৰুত্বৰ প্ৰতি লক্ষ্য ৰাখি ৰাজ্য চৰকাৰে আৰম্ভণিৰে পৰা পৰিৱৰ্তিত ঔদ্যোগিক পৰিস্থিতিৰ সৈতে খাপ খোৱাকৈ দক্ষতা বিকাশ আৰু প্ৰশিক্ষণ প্ৰদানৰ ক্ষেত্ৰত পদক্ষেপ গ্ৰহণ কৰি আহিছে। ডিজিটেল প্ৰযুক্তিৰ গুৰুত্বৰ কথা উল্লেখ কৰি তেওঁ কৃত্রিম বুদ্ধিমত্তা, ঔদ্যোগিক ইণ্টাৰনেট, থ্রী-ডি প্রিন্টিং, বৈদ্যুতিক বাহনৰ প্ৰযুক্তি আদি পাঠ্যক্ৰমৰ বাবে ছাত্র- ছাত্ৰীসকলক যোগ্য কৰি তোলা হ’ব বুলি উল্লেখ কৰে। মুখ্যমন্ত্ৰীগৰাকীয়ে কয় যে অসমীয়া ভাষাই ধ্রুপদী ভাষাৰ মৰ্যদা লাভ কৰাৰ পাছত অসমীয়া আৰু বাংলা ভাষা-ভাষী লোকৰ মাজৰ বান্ধোন অধিক শক্তিশালী হৈ উঠিছে। এই সমন্বয়ৰ পৰিবেশক সুদৃঢ় ৰূপত আগবঢ়াই নিয়াৰ বাবে তেওঁ বৰাক উপত্যকাত অসম সাহিত্য সভাৰ অধিবেশন আয়োজন কৰাৰ বাবে উদ্যোগ ল’বলৈ বৰাকৰ জনসাধাৰণক আহ্বান জনায়।
ড° শৰ্মাই আজি শিলচৰৰ ৰামকৃষ্ণ মিছন সেৱাশ্ৰমৰ শতবার্ষিকী উদযাপন কাৰ্যসূচীত অংশ লৈ শ্ৰীৰামকৃষ্ণ পৰমহংস দেৱৰ নৱনিৰ্মিত সার্বজনীন মন্দিৰ উদ্বোধন কৰে। ৰাজ্য চৰকাৰে ৰামকৃষ্ণ মিছন সেৱাশ্ৰম চিকিৎসালয়ৰ অংশ মা সাৰদা চেৰিটেবল ডিপেন্সৰীক ৫ কোটি টকা প্ৰদান কৰাৰ উপৰি ৰামকৃষ্ণ পৰমহংসৰ মন্দিৰ নিৰ্মাণৰ বাবে বকেয়া ঋণ নিষ্পত্তি কৰিবলৈ ৪ কোটি টকা আৱণ্টন দিব বুলি মুখ্যমন্ত্ৰীয়ে ঘোষণা কৰে। মুখ্যমন্ত্রী শৰ্মাক আজি বিভিন্ন কাৰ্যসূচীত গৃহ নিৰ্মাণ আৰু নগৰ পৰিক্ৰমা বিভাগৰ মন্ত্ৰী জয়ন্ত মল্ল বৰুৱা, খাদ্য, ৰাজহুৱা বিতৰণ আৰু গ্ৰাহক পৰিক্ৰমা বিভাগৰ মন্ত্ৰী কৌশিক ৰায়, শিলচৰ লোকসভা সমষ্টিৰ সাংসদ পৰিমল শুক্লবৈদ্য, বিধায়ক দিপায়ন চক্ৰৱৰ্ত্তী আৰু লোক নিৰ্মাণ বিভাগৰ মন্ত্ৰী কৃষ্ণেন্দু পালে সংগ দিয়ে।