লোকসভাত ৱাক্‌ফ সংশোধনী বিধেয়ক ২০২৫ সম্পর্কে আলোচনা চলি আছে। ২০২৪ চনৰ ৮ আগষ্টত ৱাক্‌ফ সংশোধনী বিধেয়ক আৰু মুছলমান ৱাক্‌ফ বাতিলকৰণ বিধেয়ক ২০২৪ উত্থাপন কৰাৰ পাছত ইয়াক জগদম্বিকা পাল নেতৃত্বাধীন যুটীয়া সংসদীয় সমিতিলৈ প্ৰেৰণ কৰা হৈছিল। যুটীয়া সংসদীয় সমিতিয়ে দাখিল কৰা ইয়াৰ প্ৰতিবেদন যোৱা ১৩ ফেব্ৰুৱাৰীত লোকসভা আৰু ৰাজ্যসভাত দাখিল কৰা হৈছিল। কেন্দ্ৰীয় সংখ্যালঘু পৰিক্ৰমা মন্ত্ৰী কিৰেণ ৰিজিজুৱে আজি বিধেয়কখন উত্থাপন কৰি কয় যে মুছলমান সকলৰ ধৰ্মীয় প্ৰথাৰ সৈতে বিধেয়কখনৰ কোনো সম্পৰ্ক নাই আৰু ৱফ পৰিষদৰ সা-সম্পত্তিৰ সৈতেহে জড়িত। তেওঁ কয়, যে চৰকাৰে ৱাক্‌ফ পৰিষদসমূহক সৰ্বাত্মক আৰু ধৰ্ম নিৰপেক্ষ কৰি তুলিব খুজিছে। বিধেয়কখন মছজিদৰ পৰিচালনাৰ বাবে নহয় বুলিও তেওঁ স্পষ্ট কৰি দিয়ে। বিধেয়কখনক ভৱিষ্যতমুখী বুলি উল্লেখ কৰি মন্ত্ৰীগৰাকীয়ে কয় যে ই পূৰ্বব্যাপী নহয় আৰু কাৰো সম্পত্তি জব্দ কৰাৰ ইয়াৰ উদ্দেশ্য নহয়। মন্ত্ৰীগৰাকীয়ে কয় যে বিধেয়কখন অনুসৰি ৱক্‌ফ পৰিষদত মুছলমানৰ বিভিন্ন পন্থা, মহিলা আৰু অনামুছলিম সম্প্ৰদায়ৰ প্ৰতিনিধি থাকিব। বিৰোধী পক্ষই বিধেয়কখন লৈ জনসাধাৰণক বিপথে পৰিচালিত কৰা বুলি শ্ৰীৰিজিজুৱে অভিযোগ তোলে। তেওঁ কয় যে দেশৰ যিকোনো ভূমি ৱক্ফ সম্পত্তি হিচাপে ঘোষণা কৰাৰ বাবে বৰ্তমানৰ আইনত কিছুমান ব্যৱস্থা অপব্যৱহাৰ কৰা হৈছে। তেওঁ লগতে কয় যে ২০১৩ চনত ইউ পি এৰ শাসন কালত ৱাক্‌ফ আইনত সংশোধন কৰা হৈছিল আৰু এই সংশোধনে অন্য আইনসমূহত ব্যাপক প্ৰভাৱ পেলাইছিল। কংগ্ৰেছ শাসনকালত দিল্লীৰ আগশাৰীৰ ঠাইৰ মুঠ ১২৩ টা সম্পত্তি দিল্লী ৱাক্‌ফ পৰিষদলৈ হস্তান্তৰ কৰা হৈছিল বুলি তেওঁ উল্লেখ কৰে। শ্ৰীৰিজিজুৱে কয় যে যুটীয়া সংসদীয় কমিটি আৰু চৰকাৰে এই বিধেয়কখন প্ৰস্তুত কৰাৰ সময়ত সংশ্লিষ্ট পক্ষসমূহৰ সৈতে ব্যাপকভাৱে আলাপ আলোচনা কৰিছিল। তেওঁ লগতে ভাৰতত বিশ্বৰ ভিতৰত সৰ্বাধিক ৱাক্‌ফ সম্পত্তি থকা সত্বেও ভাৰতীয় মুছলমানসকল কিয় দুখীয়া হৈ আছে বুলি প্ৰশ্ন তোলে। সংসদীয় পৰিক্ৰমা মন্ত্ৰীগৰাকীয়ে লগতে মুছলমান ৱক্‌ফ বাতিলকৰণ বিধেয়ক ২০২৪ উত্থাপন কৰে।
বিতৰ্কত হস্তক্ষেপ কৰি কেন্দ্রীয় গৃহমন্ত্রী অমিত শ্বাহে কয় যে যুটীয়া সংসদীয় সমিতিয়ে ব্যাপক আলাপ-আলোচনাৰ অন্তত এই বিধেয়কখন আনিছে। ইয়াৰ পূৰ্বে আলোচনাৰ পাতনি মেলি কংগ্ৰেছৰ গৌৰৱ গগৈয়ে বিধেয়কখনক লৈ চৰকাৰে জনসাধাৰণক বিপথে পৰিচালিত কৰা বুলি অভিযোগ তোলে। বিধেয়কখন সংবিধানৰ পৰিপন্থী বুলি সাংসদগৰাকীয়ে মন্তব্য কৰে। তেওঁ কয় যে চৰকাৰে এই বিধেয়কখনৰ জৰিয়তে চৰকাৰে দেশৰ সংবিধানক দুৰ্বল কৰিব, সংখ্যালঘুসকলক বদনাম কৰিব আৰু ভাৰতীয় সমাজক বিভাজিত কৰিব খুজিছে। তেওঁ লগতে কংগ্ৰেছৰ শাসন কালত দিল্লীত ১২৩টা সম্পত্তি দিল্লী
ৱাক্‌ফ পৰিষদলৈ হস্তান্তৰ কৰা হৈছিল বুলি শ্ৰীৰিজুৱে উত্থাপন কৰা অভিযোগ খণ্ডন কৰে। বৰ্তমানৰ আইনখনৰ সংশোধনে অধিক সমস্যাৰহে সৃষ্টি কৰিব বুলি শ্ৰীগগৈয়ে প্ৰকাশ কৰে।
আলোচনাত ভাগ লৈ সমাজবাদী পাৰ্টীৰ অখিলেশ যাদৱে মূল্যবৃদ্ধি, কর্মসংস্থাপনহীনতা, বিমুদ্ৰাকৰণ আৰু অন্যান্য বিষয়ৰ ব্যৰ্থতা লুকুৱোৰাৰ বাবে চৰকাৰে বিধেয়কখন অনা বুলি অভিযোগ তোলে। তেওঁ লগতে প্ৰয়াগৰাজত মহাকুম্ভৰ সময়ত হোৱা হেঁচা-ঠেলাৰ ঘটনা আৰু ভালেসংখ্যক লোকৰ মৃত্যুক লৈ প্ৰশ্ন অৱতাৰণ কৰে। বিধেয়কখনৰ আঁৰৰ অভিপ্ৰায় ভাল নহয় বুলি অভিযোগ কৰি শ্ৰীযাদৱে কয় যে বিজেপিয়ে দলৰ ভোট নিয়ন্ত্ৰিত কৰাৰ বাবে বিধেয়কখন উত্থাপন কৰিছে। বিধেয়কখনে দেশৰ ধৰ্মনিৰপেক্ষ ভাৱমূৰ্তিত আঘাত হানিব বুলিও সাংসদগৰাকীয়ে মন্তব্য কৰে।
তৃণমূল কংগ্ৰেছৰ সাংসদ কল্যাণ বেনাৰ্জীয়ে প্ৰস্তাৱিত বিধেয়কখনক ভুল, অযুক্তিকৰ আৰু স্বেচ্ছাচাৰী বুলি অভিহিত কৰে। তেওঁ লগতে বিধেয়কখনৰ জৰিয়তে মুছলমান সম্প্ৰদায়ৰ লোকৰ অধিকাৰ হ্ৰাস কৰিব বিচৰা হৈছে বুলি অভিযোগ উত্থাপন কৰে। ধর্মীয় নীতি-নিয়ম পালন কৰাটো কোনো বিধেয়কৰ ভিত্তি হ’ব নোৱাৰে বুলি সাংসদগৰাকীয়ে মন্তব্য কৰে।
আলোচনাত ভাগ লৈ বিজেপিৰ ৰবিশংকৰ প্ৰসাদে কয় যে দেশখনত সকলো ধৰ্মৰ লোকৰে সমান অধিকাৰ আছে, ইয়াক লৈ কোনো সন্দেহ নাই। বিধেয়কখন সন্দৰ্ভত হোৱা আলোচনাত বিৰোধী পক্ষৰ নেতাসকলে উদ্দেশ্যপ্রণোদিতভাৱে সংবিধানৰ বছা বছা অংশৰ উদ্ধৃতি দিয়া বুলি বিজেপিৰ সাংসদগৰাকীয়ে অভিযোগ তোলে। আইনৰ পূৰ্ণ উদ্ধৃতি আগবঢ়াবলৈ বিৰোধী পক্ষৰ প্ৰতি আহ্বান জনাই শ্রীপ্রসাদে কয় যে সংবিধানে ৱাক্‌ফ সম্পত্তিৰ সুৰক্ষা আৰু উপান্ত সম্প্ৰদায়সমূহৰ উত্থানৰ বাবে চৰকাৰে গ্ৰহণ কৰা কাৰ্যক সমৰ্থন কৰে। তেওঁ কয় যে বিধেয়কখনত ৱাক্‌ফ পৰিষদত মহিলাৰ বাধ্যতামূলক অন্তর্ভুক্তিত প্ৰস্তাৱ দিয়া হৈছে যাতে পৰিষদৰ সম্পত্তিৰ ব্যৱস্থাপনা অধিক স্বচ্ছ কৰি তুলিব পৰা যায় আৰু লিংগ ন্যায় সুনিশ্চিত কৰিব পৰা যায়৷