আমেৰিকা যুক্তৰাষ্ট্ৰৰ কেলিফর্ণিয়াৰ লছ এঞ্জেলছৰ কেইবাটাও এলেকাত বনজুইয়ে ব্যাপক ৰূপ ধাৰণ কৰাৰ ফলত ৫জন লোকৰ মৃত্যু হোৱাৰ লগতে হাজাৰ হাজাৰ আন্তঃগাঁথনিৰ জুইত জাহ যায়। অঞ্চলসমূহৰ পৰা ৭০ হাজাৰৰো অধিক লোকক সুৰক্ষিত স্থানলৈ লৈ যোৱা হয়। এই ঘটনাৰ পৰিপ্ৰেক্ষিতত দেশখনৰ বিদায়ী ৰাষ্ট্ৰপতি জ’ বাইডেনে তেওঁৰ ইটালীৰ অন্তিমটো বিদেশ ভ্ৰমণ বাতিল কৰে। লছ এঞ্জেলছত যোৱা বুধবাৰে সূত্ৰপাত হোৱা এই বনজুইয়ে আঢ্যৱন্ত এলেকা পেচিফিক পেলিচেদচকে ধৰি অনান্য অঞ্চললৈ বিয়পি পৰে। বনজুইয়ে এহেজাৰৰো অধিক সম্পত্তিৰ বিস্তৰ ক্ষতিসাধন কৰাৰ লগতে বহু লোক আহত হোৱাৰ বাতৰি পোৱা গৈছে। জলবায়ু পৰিবৰ্তনৰ ফলত উষ্ণতা বৃদ্ধিৰ বিপৰীতে বৰষুণৰ পৰিমাণ কম হোৱাৰ বাবে এই বিধবংসী বনজুইৰ সূত্ৰপাত হয় বুলি দেশখনৰ কৰ্তৃপক্ষই প্ৰকাশ কৰিছে।