প্রধানমন্ত্ৰী নৰেন্দ্ৰ মোদীয়ে আজি মহাৰাষ্ট্ৰৰ জলগাঁৱত আয়োজিত এটা অনুষ্ঠানত ১১ লাখ নতুন লাখপতি বাইদেউক প্ৰমাণপত্ৰ প্ৰদান কৰে। প্ৰধানমন্ত্ৰীয়ে লাখপতি বাইদেউসকলক সম্বৰ্ধনা জনোৱাৰ লগতে ব্যৱসায় সন্দৰ্ভত তেওঁলোকৰ সৈতে মত বিনিময়ো কৰে। অনুষ্ঠানত সমৱেত লোকসকলক সম্বোধন কৰি প্ৰধানমন্ত্ৰীয়ে কয় যে, ভাৰতৰ নাৰী শক্তিয়ে সদায় দেশ আৰু সমাজৰ ভৱিষ্যত নিৰ্মাণ কৰাত বৰঙণি যোগাই আহিছে। মহিলাসকলৰ বাবে এসময়ত নিষিদ্ধ হৈ থকা সকলো দিশ মুকলি কৰাৰ বাবে চৰকাৰে প্ৰচেষ্টা অব্যাহত ৰাখিছে বুলি তেওঁ প্ৰকাশ কৰে ৷ মহিলা সৱলীকৰণৰ লগতে তেওঁলোকৰ নিৰাপত্তাৰ দিশটো চৰকাৰৰ অন্যতম অগ্ৰাধিকাৰ বিষয়বস্তু বুলিও তেওঁ সদৰী কৰে। প্ৰধানমন্ত্ৰীয়ে কয় যে, নাৰী নিৰ্যাতন এটা অক্ষমনীয় অপৰাধ আৰু এই অপৰাধ কৰাসকলক ৰেহাই দিয়া নহ’ব। তেওঁ লগতে কয় যে, চিকিৎসালয়, বিদ্যালয়, কাৰ্যলয়সমূহ তথা আৰক্ষী প্ৰশাসনৰ দৰে ৰাজহুৱা প্রতিষ্ঠানসমূহ এই ক্ষেত্ৰত জবাবদিহী হোৱা উচিত আৰু এই ক্ষেত্ৰত কৰা কোনোধৰণৰ অৱহেলা গ্ৰহণযোগ্য নহয় । শ্ৰী মোদীয়ে কয় যে, মহিলাৰ মৰ্যদা তথা জীৱনৰ সুৰক্ষা চৰকাৰ আৰু সমাজৰ আটাইতকৈ বৃহৎ দায়িত্ব।