মণিপুৰৰ পূব ইম্ফল আৰু কাংপপি জিলাৰ সীমান্তৱৰ্তী থামনাপক্‌পিত কুকি আৰু মেইটেই জনগোষ্ঠীয় বিদ্ৰোহীৰ মাজত হিংসাত্মক সংঘর্ষ অব্যাহত আছে। ঘটনাস্থলীত আৰক্ষী তথা নিৰাপত্তাবাহিনীৰ লোকক পৰিস্থিতি নিয়ন্ত্ৰণৰ বাবে নিয়োগ কৰা হৈছে। এই সংঘৰ্ষত সাংবাদিক, আৰক্ষীসহ বহুলোক আহত হোৱাৰ খবৰ পোৱা গৈছে। অঞ্চলটোত আতংকিত ৰাইজে গাঁও এৰি নিৰাপদ স্থানলৈ পলায়ন কৰিছে। ৰাজ্যখনৰ কেতবোৰ অঞ্চলত নতুনকৈ হিংসাত্মক ঘটনা আৰম্ভ হৈছে। পূব ইম্ফল জিলাত এদল সশস্ত্ৰ লোকৰ সৈতে হোৱা গুলীয়াগুলিত কেইবাজনো সাধাৰণ লোক আৰু সুৰক্ষাকৰ্মী আহত হয়। মণিপুৰ আৰক্ষীয়ে প্ৰকাশ কৰা অনুসৰি সকলো স্পৰ্শকাতৰ অঞ্চলত নিৰাপত্তা ব্যৱস্থা কটকটীয়া কৰি তোলা হৈছে।