বৰপেটা জিলাৰ ভৱানীপুৰত আজি পুৱতি নিশা সংঘটিত এটা পথ দুৰ্ঘটনাত চাৰিজন লোক মৃত্যুমুখত পৰে। এই দুর্ঘটনাত এটি শিশুকে ধৰি আন তিনিজন লোক আহত হয়। আকাশবাণীৰ বৰপেটাৰ সংবাদদাতাই জানিবলৈ দিয়া মতে নলবাৰীৰ পৰা ৰাসৰ কাৰ্যসূচী উপভোগ কৰি বৰপেটাৰ যতিগাঁৱলৈ উভতি অহা এই লোককেইজনক কঢ়িয়াই অনা গাড়ীখনে পুৱতি নিশা ভৱানীপুৰৰ ২৭ নম্বৰ ৰাষ্ট্ৰীয় ঘাইপথত ৰৈ থকা এখন ট্রাকত পাছফালৰ পৰা খুন্দা মাৰে। এই দুৰ্ঘটনাত তেওঁলোকৰ গাড়ীখনৰ সন্মুখখন ভাগি যোৱাৰ লগতে চাৰিজন লোকে থিতাতে প্ৰাণ হেৰুৱায়। দুৰ্ঘটনাটোত আহত লোককেইজনক আৰক্ষীয়ে বৰপেটাৰ ফকৰুদ্দিন আলী আহমেদ চিকিৎসা মহাবিদ্যালয় হাস্পতাললৈ প্ৰেৰণ কৰে ।